Group B In Portugal Maw A Tla Lai Iran Dah?
City Hunter| 2018 June 21| Tukum World Cup zuamnak ah Group A in Egypt le Saudi Arabia an tla cang i Russia le Uruguay an kai cang. Group B in Morocco zong a tla ve cang. June 25 deilei suimilam 12:30 ah Iran le Portugal an chuih lai i a sunghmi paoh an tla kho. Cucaah Group B in Iran maw a tla lai, Portugal dah?
Group B ah aa telmi phuli cu; Portugal, Iran, Spain le Morocco an si. Morocco puai hnih an sungh cang caah group in an tla cang. Asinain, June 25 deilei suimilam 12:30 ah Spain he puai tlinnak ding ah an chuih rih lai. Spain nih an tei hna lai tiah zapi nih zumh deuh cio a si. Spain nih an tei hna ahcun mark 7 an ngah lai caah Spain cu group B in an awng lai.
June 25 deilei suimilam 12:30 ah chuih dingmi Iran le Portugal puai hi Iran caah siseh, Portugal caah siseh group in an awn le an sungh ding biakhiaktu ding puai a si. A aungmi phu paoh group in an awng lai i a sungmi phu paoh group in an tla kho. A donghnak bik caantha an ngeimi veve a si caah an biatak cio lai i zoh zong an nuam ngai lai. Iran hi atu ah mark 3, Portugal hi mark 4 le Spain hi mark 4 an ngei.
Iran le Portugal puai hi kapkhat lei in Spain caah a biapi pah ve. Zeiruang ah ti ahcun Portugal nih an tei hna ah siseh, goal sut lo in an i tluk ah siseh, Spain nih Morocco an sungh hnawh sual hna hmanh ah Group B in Portugal le Spain thiamthiam an kai lai. Cu tluk in cun Spain caah group in kainak ding a lam a kau. Group B in Iran an kainak ding ahcun Portugal kha tei ding in chuih hrimhrim a hau. Iran an awn ahcun Group B in Spain le Iran an kai lai.
Cucaah, June 25 deilei suimilam 12:30 ah chuih dingmi Iran le Portugal puai hi a biapi tukmi le zoh a nuam tuk dingmi puai a si. Portugal an awn ahcun C. Ronaldo caah sui kedan co khawhnak ding lam aa hung lai i an sungh ahcun a pit ve lai. Morocco dih hnu ah Group B in Iran maw a tla maw, Portugal dah? Lungtor ngai in June 25 zan hngak cio hna usih.
About The Author
