Gyobingauk PDF sakhaan an luh hnawh hna lioah an sin ah aa dormi tar 2 le kum 8 hngakchia telh in minung 19 an tlaih hna
The Chinland Post | 2022 August 29 – Thayarwaddy pengkomh PDF battalion 3,801 ṭhen a simi Kyobingauk PDF sakhaan SAC ralkap nih an luh hnawh lioah an sin ah aa dormi tar 2 le kum 8 hngakchia telh in minung 19 an tlaih hna tiah People’s Spring nih a langhter.
Bago ah hram a bunhmi Gyobingauk peng PDF sakhaan cu August 26 ah SAC ralkap nih thazang tampi in an luh hnawh hna i PDF nih an doh ve ko hna nain thazang a ruan lo caah sakhaan a ning piin an thlah tiah theih a si.
“An rat lioah bom puah hnawh kan i tim nain duty a hngakmi kan hawipa an tlaih. Cun thilri chantu hriamtlai 2 zong an tlaih hna. Anmah pawl kha lam an hmuhsak ter hna i kan sakhaan an kan luh hnawh hi a si” tiah Tharyawaddy pengkomh PDF battalion 3,801 ṭhen rianngeitu nih people’s spring ah a chim.
Kan sakhaan thar hmunhma an theih cu a hman ko nain a hlan sakhaan, hriamtlai cazin le thil sinning an theih khawhnak a ruang hi cu sakhaan ah thla 4 hrawng a rak ummi Gyobingauk Hluttaw palai hlun U Aung Ko Min nih SAC nih ah aa ap ruangah a si tiah a chim.
Cu sakhaan ah a pawngkam khuami an rak i dor tawn i sakhaan luh hnawh lioah mipi le hriamtlai 60 chungah 19 an tlaih hna tiah a chim.
Hluttaw palai hlun Aung Ko Min cu SAC sin ah a ap i a luancia ni 10 zongah Gyobingauk PDF 1 hriam he aa va ap i M12 zuun 1 veve kan sung tiah a chim.
Tlaih a tongmi hriamtlai le mipi pawl dah ti lo cu himnak hmun ah kuat dih an si cang tiah a chim.
About The Author
