Hakha Ah AYA Bank An Hun Chap I Bank Pali A Um Cang
Salai Cung Cung |2019 February 26| Hakha ah Ayeyarwady Bank (zungthen) cu February 22 zingka ah hunnak an tuah hnu in Hakha ah bank pali a um cang tiah kan theih.
“Ayeyarwady Bank (zungthen) hi Hakha he cun 250nak a si cang. Chin ramkulh chung kadang zong ah Bank (Then) tuah kan i tim rih ko. Hakha AYA Bank (zungthen) kan tuahnak a ruang cu Chin ramkulh thanchonak ding le khuami pawl zong rian ngei hna seh ti kan duh. Cun Chinmi thanchonak ca ah a lamkip in bawmh khawh i zuam kan duh caah a si” tiah Hakha AYA Bank (Then) Manager U Aung Kyi Khang nih The Chinland Post ah a chim.
“Hi kan Bank ah service a ngahmi pawl cu, tangka ap le tangka i khawn a ngah. Cun tangka zong cawi khawh a si, ATM le Western Union zong an ngah. ATM tuah duhmi nih a herhmi pawl cu pumpak in zung ah rat zong a ngah. Hi bank hunnak kan tuah lio ah Chin ramkulh minister pahnih nih an kan telpi khawh” tiah a chimchih.
Hakha Ayeyawady Bank ah rian tuantu staff zapi minung 23 an si i Laimi minung 18 an si. Manager ah U Aung Kyi Khang a si. Phone – 070-22581 le fax-070-21311 le 21489 ah pehtlaih khawh an si tiah kan theih.
Tu lio Hakha ah a ummi bank pali cu; AYA Bank, KBZ Bank, CB Bank le cozah ngeihmi Myammar Economic Bank an si. CB bank hun a si dih hnu ah KBZ bank nih an hun ve. Atu ah CB bank cu Hakha Khuathar ah zungthen an sak chap i arauh hlan ah an hun cang lai. Cu pin ah Thantlang zong ah hun chap an timh i inn an sak liopi a si tuag kan theih.
AYA bank cu Pyidawtha, Boygoke lampi cung, Mingalar Guest House pawng ah a um. CB bank cu Pyidawtha, Bogyoke lampi cung, Myomah Market hmai ah a um. CB bank zungthen cu Hakha Khuathar, Bogyoke lampi cung, B.E.H.S-No.2 sianginn pawng ah aum. KBZ bank cu Hakha lamtonnak- Matupi lamcung ah a um.
CB bank le AYA bank hi Chin ramkulh Hakha lawng ah hunnak an tuah rih. KBZ hi Hakha le Falam ah hunnak an tuah ve cang tiah kan theih.
Photo: AYA bank facebook
