Hakha ah Chin Miphun Ni Hmuh Hnih Ah An Tuah Lai

Kum 72nk Chin Miphun Ni, Thantlang Khuapi

Salai Tluangkipthang| 2021 Feb. 17 — Ralkap nih nawlngeihnak an chuh hnu in, uktu thar an ser mi nih Chin ramkulh khualipi ah Chin Miphun Ni, Feb. 20 ah tuah ding in timhtuahnak an ngeih tiah theih a si.

Ralkap nih Chin ramkulh uknak ah tuanvo latu ding ah an sawm mi nih, “Hakha ah Chin miphun ni tuah ding in timhtuahnak kan ngei. Feb 20, Zing sml. 10:00 in kan tuah lai. Voidang bantukin cun hlunghlai le a ngan pi in cun tuah a si lai lo. Nain, Chin Miphun Ni tuah tawn ning bang, upa minung pakua cu a cung ah thu ding mi (ta-ba-pa-tih) 9 cu thim an si cang” tiah a chim.

Hakha Khualipi Inn (Myodaw Khan-mah) ah zing sml. 10 in tuah ding in timhtuah a si. Atu lio, Chin ramkulh caah Ralkap nih nawlngeitu bik ah an chiah mi Pu Ngun San Aung nih Ramkomh Kawlram Ralkap Lutlai le tulio Ralkap in nawlngeitu lubik Min Aung Hlaing nih ca rak kuat mi (ta-wun-hlua) cu a rel lai tiah a chunglei riantuantu pakhat sin in kan theih.

Asinain, atu bantuk in Ralkap cozah nih rak timhtuah hlan ah a hlan kan in rak cawlcang cangmi Chin miphun nunphung kilvengtu zatlang bu pakhat nih nih cun a dang tein tuah ding ah timhtuahnak an ngei.

Hakha hrambunh Chin Nunphung zangtlang bu in tuanvo ngeitu pakhat nih, “Ralkap nih ser thar mi cozah in lutlai ah an khinh mi Pu Ngun San Aung nih anmah he tuah ti ding in an kan sawm ko. Asinain, kan duh lo. Anmah he tuah ti ahcun, anmah nih minthatnak an i lak timh sawhsawh mi lawng a si lai tiah kan ruah caah a hlan kan i timh ning bang in kalpi ding in timhtuahnak kan ngei ko” tiah a chim.

“Kan nih cu, a tulio kan boruak he Online in biachimmi le hlasak mi thlah ding lawng in timhtuahnak kan ngei. Chin Miphun Ni a tlau lo nak ding, tuah lo in a um lo nak ding ah tuah ding in kan timhlamh mi a si. Zaanlei sml. 2 ah Online kan thlah lai. Cuahcun, Upa lei in Vuanci a rak kan tuah piak mi Pu Ram Mang le Mino lei in CHRO ah Program Director a tuan lio mi Mai Thin Yu Mon kan fial hna. Cun, hlasaknak tlawmpal te a um lai. Mah lawng cu a si ko. Atu hmanh ah, Chin Miphun Ni kan tuah hnik mi kong ah soiselnak a tam ngaingai. Kan boruak ruang ahhin a si, kan theih thiam ko. Nain, kan Miphun Ni a si caah tuah lo ngaingai um ding cu kan duh lo caah kan timhtuah mi a si” tiah tuanvo ngeitu pakhat nih The Chinland Post ah a chim.

The Chinland Post nih kan hlathlai tik ah, Chin Miphun Ni an rak timhtuah mi kongkau ah Khuanu/pa aiawh in Pu Ngun San Aung hi rak fial mi a si nain, Ralkap nih atu ah an sawm cang caah amah kha biachimter ding in an duh tilo tiah kan theih.

Atu bantukin kan boruak a um lio ah, Chin Miphun Ni tuah ding in timhtuahnak kong ah a duhlo lei in soseltu tampi an um lio ah, micheu khat nih cun tuah ding a si ko. Chin Miphun Ni i a muru cu Zauk phung kan duhnak kan langternak le mahte khuakhan lairelnak kan duh mi kan langhter ni pei a si cu, cucaah Chin Miphun Ni kan tuah mi lila hi Ralkap Uknak kan duhlo mi langhternak ah hmang hna u sihlaw a tha ko tiah a chim mi zong an um ve thiamthiam.

Nihin tiang thawngpang kan hlat khawh tawk ah, Chin ramkulh khualipi Hakha ah Chin Miphun Ni cu a dangdang in hmuh hnih ah tuah dawh a si. Hihi Hakha ah tuah mi Chin Miphun Ni tuah mi tuanbia kan zoh tik ah, a voikhat nak zong a si kho men.

Hitin, Chin Miphun Ni hmun hnih ah tuah ding a hun phanhnak a ruang bik cu Ralkap Cozah nih ser mi Chin Ramkulh Uktu hna nih sawmnak cu nunphung a dirkamhtu phu nih an cohlan lo ruang ah a si tiah kan theih. ###

Na ruahning rak langhter ve.. (Leave a comment)

%d bloggers like this: