Hakha ah COVID-19 Hrik Ngei Minung (3) An Hmuh Chap_Chinram ah Minung (219) sin Hmuh A Si Cang

TCP-Hakha| 2020 December 23| Hakha COVID-19 hrik a ngeimi he aa pehtlaimi minung (3) sin ah covid hrik an hmuh than tiah December 23, 2020 ni ah Hakha penguk zung in kan theih.

Hakha ah COVID-19 hrik a ngeimi Case 111272 he aa pehtlaimi GTI FQ ah Yangon kir an chiahmi minung pa (2) le Hakha University ah FQ an chiahmi nu (1) an zapi minung (3) sin ah COVID-19 hrik an hmuh than. Hakha Golf celhnak pawng a ummi Taingyin Siizung ah ah an chiah hna.

December 21, 2020 Tedim peng Tuithang khua in Quarantine an chiahmi hna minung (9) sin zong in COVID-19 hrik hmuh a si.

COVID-19 Case No.1 cu Tedim in rak hmuh hmasat bik a si i Chin ram ah December 21, 2020 tiang COVID-19 hrik hmuhmi minung (216) an si cang tiah Chin ramkulh ngandamnak lutlai Dr. Aung Ngwe San nih a facebook ah a langhter. Nihin December 23, 2020 Hakha minung (3) hmuhmi he cun Chin ram COVID-19 hrik hmuhmi minung 219 an phan cang tinak a si.

COVID-19 Caankhat ( first Wave) March 29, 2020 in August 16 tiang ahhin hrik hmuhmi minung (18) an si I cu chung ahcun ramdang kir minung (15) le ramchung in minung (3) an rak itel. COVID-19 Caanhnihnak (Second Wave) August 17 in nihin ni tiang minung (201) ah hmuh a si cang i ramdang kir minung (13) le Chin ram a rak lutmi minung (119) le khuachung ichonhmi Hakha nihin ta telh in minung 69 tluk an si cang tiah kan theih.

Dr. Aung Ngwe San cazin ning ahcun Hakh ah COVID-19 hrik angei cangmi minung (33), Thantlang 1, Falam 16, Tedim 54, Tonzang 21, Mindat 53, Kanpetlet 1, Matupi 24, Paletwa 16 an si cang tiah a langhter.

COVID-19 hrik a ngeimi minung 60%-80% hi an zawtning langh lo in midang hrik an chonh tawn hna. I ralrin lo ahcun hrik chonh a fawi ngaimi a si. Cucu khuachung ichonh ning kan ti i irunven a har ngaimi zong a si. Cucaah mizapi nih COVID-19 zulhphung zulh ding ibawmcio a herh. Khual tlawn lo zongah khuachung in COVID-19 hrik ichonh khawh a si.

Khual tlawn lo le hrik a ngeimi he ipehtlai lo zongah taklinh, khuh khuh, hrawmfak, chungtlik, hrim thei lo tbk dirhmun na si ahcun COVID-19 hrik ngeiding dirhmun na si caah na chek hrimhrim a herh tiah Dr. Aung Ngwe San nih a langhter.

Tulio mibu sin chuah lo in inn um khawh chung um ding, leng chuah tik ah aa hlat pi um ding, Kuttawl, handgel le mask tha tein hman peng ding a biapi ngaingai. Tulio Tedim le Mindat ah rang tak in COVID-19 ichonh cuahmah a si tiah theih a si.

December 25 Christmas tuah zong COVID-19 zulh phung ningin minung 30 lawng in Peng Cozah hnatlaknak in tuah khawh a si lai. Chin ramkulh lengin a rak lutmi paoh cu Hakha Facility Quarantine ah ni (14) chiah dih a si.

 

Na ruahning rak langhter ve.. (Leave a comment)

%d bloggers like this: