Hakha Ah Cozah Nih Inn A Hrawhmi Ruang Ah Nu Pakhat Sii-Inn A Phan

The Chinland Post| 2019 August 20| August 20 zing ah Hakha khua, Cawbuk sang i ekah 676 innhmun samh dingmi hmun chung i inn pawl an hrawhmi ruang ah kum 42 a simi nu pakhat sii-inn ah a phan.
Inn cu theng (seh-gyi) 13 le minung 300 hrawng nih an hrawh cuahmah lio ah kum 42 nu hi a inn an hrawh lo nakhnga a inn sakmi chung ah a um. Cucaah, palek nih cu nu cu innchung in innleng ah an rawt chih i cu ruang ahcun shock a ngah i Hakha sii-innpi ah an kalpi colh.


Sii-inn an phakpi hnu ah oxygen an rawnh colh i rau lo te ah a lung a hung fim than. Caan tlawmpal chung sii-inn a um hnu ah inn ah an tinpi.
Sii-inn a phanmi kum 42 nu hi hmasa ahcun a inn hrawh dingmi cazin ah aa tel lo. Asinain, cozah nih ruahlopi in an telh than caah thih ngamh in a inn sakmi cu inn thehpiak ni August 20 ahcun a ven. Cuti a vennak ruang ah palek nih an rawt chih i atu bantuk in thil poipang a tonnak hi a si.


Ekah 676 khua samh dingmi chung ah phungninglo in sakmi inn zapi hi 135 a si. Cu vialte cu tazacuai an si nain an chuak lo. Minung 30 lawng an chuak. Minung 30 chung ah minung 22 nih inn kan thet kho lo an ti caah minung 8 lawng hi innhmun ruahpiak an si lai tiah acozah lei nih an chim.

Hika ah inn an hrawh lio video zoh khawh a si.

 

Na ruahning rak langhter ve.. (Leave a comment)

%d bloggers like this: