Hakha Ah Ekah 600 Renglo Innhmun Thar Kan Samh Lai; Minister U Soe Htet

Tawk Tling Thang| 2019 January 4| Chin khualipi Hakha khuapi chung ah Chinram cozah tawlrelnak in ekah 600 renglo a rauh hlan ah innhmun thar an samh lai tiah kan theih.

Hakha innhmun thar samh dingmi kong he pehtlai in The Chinland Post nih Chin ramkulh cozah bu chimnak nawlngeitu Minister U Soe Htet pehtlaihnak kan tuah i atu bantuk in a chim.

“Hakha cu Chin khualipi a si ca le inn ngei lo innhlang an tamtuk caah ekah 676 innhmun thar kan samh lai. Atu hi town plan zohthiam le tuahthiam nih an zoh cuahmah lio a si. Atu hmun kan samh tiknak hmun hi Cawbuk le CCU pawng hrawnghrang khi a si. Ekah 676 in a hmun zoh a si cang. Hi ekah 676 chung ah inn hmun zeizat dah a chuak te lai timi cu a fiang kho rih lo. Thla hnih chung ah innhmun a chuak lai i March thla hrawng khin cun zapi sin ah samh khawh a si te ko lai. Innhmun ngei lo, innhlang hi papek in ruahpiak an si te lai. Asinain, zeitindah innhmun pek le samh a si lai timi cu biakhiahnak kan tuah rih lo”.

Chinram cozah nih innhmun samhnak caah Sipin budget ks. sing 2700 hrawng an hman. Mah ks. sing 2700 in innhmun chunhnak, lam tuahnak tibantuk a herhmi riantuannak caah an hman lai. Hi riantuannak caah Chin ramkulh cozah nih company sin ah ks. sing 3000 hrawng lei a ba tiah Chin ramkulh cozah bu in tuanvo ngeitu pakhat sin in kan theih.

“Innhmun kan samh tikah hin cozah nih lam, hlei, sianginn, certual tibantuk tuahpiak dih a hau. Hi vialte tuahnak caah budget tampi a dih. Hi tuahnak caah chawva tlamtlingte in cozah nih a kan chiahpiak lo. Cucaah, innhmun hi alak (free) in pek awk an tha lai lo. A tlawmbik ks. sing 5 asiloah sing 10 (1,000,000) paoh cu laak an si te ko lai. Innhmun a thatnak le a chiatnak hi a man aa khat te lai lo. Innhmun a that deuhnak hi cu ks. sing 20 in ks. sing 50 tiang zong a phan te kho men” tiah Minister U Soe Htet nih a biapeh ah a chimchih.

Inn hmun samh dingmi a bitkauh cu buaktlak in pe 60×80 an si te lai. Atu bantuk in NLD cozah thar a kai hnu in Hakha ah cozah nih innhmun voihnih an samh bal cang tiah kan theih.

Na ruahning rak langhter ve.. (Leave a comment)

%d bloggers like this: