Hakha Ah HBA Mino Tawrelnak In Music Training An Tuah Cuahmah
Salai Cung Cung |2018 August 9| Hakha ah HBA Youth Department tawrelnak in mino Music training, Guitar, Drum, Piano cawnnak an tuah lio pi si tiah kan theih.
“Hi music cawnnak training cu July 16 in August 31 tiang tuah asi lai. Music chimtu hna cu Guitar ah Zomi, Drum ah Van Min Thang, Piano ah Mang Lian Chawn an si. Hi music traning kainak caah hin minung pakhat nih 30,000 cio thawh asi. Mah an thawh mi hi pumpak si lo in khirfabu lei nih tuanvo lak cio an si. Pathian kan thangthatnak ah hin thawngtha chim lawng in azat lo caah music hi a biapi tuk mi asi. Pumh tik zong ah music tling tein tum khawh ah cun pum zong a nuamh caah Pathian sin ah thla kan cam i kumkhat voikhat hi mino music traning tuah khawh peng ding in timhtuahnak kan ngei. Hi traning kan tuahmi nih thathnemnak tampi a chuahter lai tiah kan ruah. Hi music traning cu HBA mino nih kan tuah ko nain bu dang zong a rak kaimi an um ve” tiah HBA- Youth Department Secretary Pastor Van Tling Thang nih The Chinland Post ah a chim.
Hi Music traning a kai khomi hi minung 30 an si i Hakha khuachung lawng si lo in khuadang zong an i tel. Gangaw peng Daidim khua in pakhat, Hakha Free Methodist in pakhat, Lautu Bapist Church in Pathum an dihlak 30 an si. HBA tawrelnak tuahmi music traning cu kumkhat voikhat tuahmi asi i hmailei zong peh zulh peng asi ko lai tiah kan theih. ++++
About The Author
