Hakha Ah Hotel Le Tourism Guide Training A Kaimi Minung 40 Certificate An Pek Hna
Salai Cung Cung|2018 August 1| Hakha Town Hall ah August 1 zing suimilam 8:30 in Hotel le Tourism Guide training a kaimi minung 40 certificate an pek hna tiah kan theih.
“Hi Hotel le Tourism Guide Training cu July 9 in kan thawk i August 4 ah dih ding a si, certificate pek hnu ah nihnih an kai rih lai. Training a kai khomi hi minung 40 an si caah voikhat ah kan chim dih kho hna lo i minung 20 in phu hnih ah kan than hna. Kei hi Basic computer ka chim hna i computer hardware le software tlawmpal zong ka chimh chih hna. Hmailei zongah hi bantuk training hi pehzulh peng kho peng hna seh ti hi ka duh. Ram le miphun caah thahnemnak tampi a chuahpi lai ti ka ruah” tiah computer chimtu Thawng Cung Lian nih The Chinland Post ah a chim.
“Yangon in mah training kai dingah hin Hakha ah ka rak tlung. A hramthawk tein Hotel le tourism khualtlawnnak kongkau hi ka uar ngaimi asi. Tourist guide- holh lettu (lamhmuhsaktu) si hi kan duh ngai mi si. A hlan ah cun Tourism hi theih sawh lawng in ka rak theih i ramkulh vuanthok U Aung Phyo nih tha tein a kan chimhfel hnu lawng ah a sullam hi kaa fiang. Hi ka kainak thawng in tourism he aa pehtlai mi fimnak zong kan theih i cun basic computer le English zong kan cawn chih caah thil tha tampi le fimnak tampi kaa chap. Cawnpiaktu saya hna nih lungsau tein a kan chimh i zei paoh te a tlamtling dih ko. Hi training dih in Yangon lei ka kal hnu zong ah tourism rian hi tuan dingah kaa tim” tiah training kaimi nu pakhat nih The Chinland Post ah a chim.
“Hi Hotel le Tourism guide training tuahmi nih aa tinhmi cu Chin ramkulh tourism lei thanchonak dingah asi. Chin ramkulh tourism an um ko nain lamhmuhsaktu an um lo ah cun harnak tampi a um kho. Cucaah hi training cu a hrampi (introduction) tourism guide asi. Tourism guide caah a herhmi apawl basic English le computer kan chim hna. Hi tourism pawl hi Chin ramkulh caah thatnak tampi a chuak, tangka tampi hmuhnak zong asi, a dangdang lei zong in thanchonak tampi a chuak kho. Asinain cu tourism pawl cu lamhmuhsaktu um lo ah cun a si kho fawn lo. Cucaah, hi training kan tuahmi asi. Hi training hi hmailei ah kan pehzulh peng ko lai. Hi certificate kan pekmi hna zong hi hmailei ah tampi a thathnemnak a um te lai. A ruang cu cozah lei nih hnatlakpi mi asi caah rian tuannak ah tampi a thahnem lai” taih Hotel le tourism Director U Aung Phyo nih The Chinland Post ah a chim.
Hi training cu Directories of Hotel and Chin ramkulh tawlrelnak in tuahmi a si. Hi training tuah caah budget a chuahpiaktu cu ministry of Hotel and Tourism an si. Chin ramkulh ah a hmasa bik an tuah a si tiah kan theih.
