Hakha ah Inn (2) A Kang, Minung (6) An Thi

Salai Josephbawi| 2021 February 2| Chin Ramkulh khualipi Hakha, Dawrthar Sang chungtel (Dillo Sang) ah Pu Hrang Cung (Zokhua) te inn le inndang pakhat a kang i Pu Hrang Cung inn in afale minung (5) le a u fapa minung (1) an zapi minung (6) a kangh chih hna tiah kan theih.

“Mei aa thok caan hi Zinglei 5:40am tluk ah a si. Thil puak thong bantuk ka theih I ka van zoh cu Pu Hrang Cung te inn thlalang awng in mei a rak alh len khi ka hmuh. Pu Hrang Cung cu inn leng a van chuak I thing tanbo lak in innka bauh aa tim khi ka hmuh I a rannak in na chung le chanh hna ka ti I ka au. Zei luklak ah rang tuk in a ciam dih manh. Hika inn ah an ithialnak zong asau rih lo, innpa he hmanh kan itheituk rih lo” tiah an innkam lamchak lei ummi Bawi Tha Nu nih The Chinland Post ah a chim.

“A thimi dihlak minung (6) ruak kan char. Siizung lei an chekhlat hmasa hna. An inn hi dot thum an sak tharmi a si. Ngakchia ruak pawl Inntang kang an tlak ning zoh tikah Inntang in mei I thawk dawh a si ko. Zei in dah aa thok ti cu kan hlat kan tuak cuahmah lio a si tikah chim awk a tha rih lo” tiah Pengkomh Meithat zung bawi nih The Chinland Post ah a chim.

Inngeitu le fa le thihlo a tuartu Pu Hrang Cung nih “ Zinglei 5:30am tluk hrawng ah ka tho I kuak ka zu, cu ahcun thil puak thawng (karat karat) tikhi inntang lei in ka theih. Ka van zoh cu mei a rak kang thluahmah cang. Ka sin a riakmi ka fa le ka nupi lawng kan luat. Ka fale chanh ding ka zuam len nain ihnak khan an hrenh ca le caantling in ka bauh khawh lo caah hiti an ka liamtak hi a si” tiah Meithattu Bawipawl biahal lio le Media sin ah a chim.

Hringtu a pa Pu Hrang Cung cu thinphang thlalau le ngaichiattuk a um lio a si caah fiang deuh in kan hal kho ti lo.

Pu Hrang Cung fale a thimi cu Par Tha Hlei (16), Ngun Nawn (13), Siang Tha Len (8), Van Ni Hnem (6), Bawi Chit Thu (4) le Pu Thio Hnin fapa Samuel (19) an si.

2021 January Chung ah Hakha peng ah Tinam khua ah inn pakhat, Falam ah January 12 ah inn a kang I inn (6) le minung (2) thihlonak, Thantlang ah Pu Thang Hrin inn, Hakha khuathar ah inn (3) le minung (1) thihlonak ton a si. February 2, 2021 thla hramthok ah hi bantuk Hakha inn(2) kanghnak le minung (6) an thih tikah mei hmannak kong he mizapi thinphan ngai in um a si. Phiangkum a si caah mei kang a tam lai a timi zong an um.