Hakha Ah Innhmun Ekah 700 Le Khuapi Area Ekah 28000 Samhmi Dohkalhnak Lam An Zawh Lai

0

Photo: TCP

Tawk Tling Thang| 2019 January 21| Chinram cozah nih innhmun caah ekah 700 le khuapi area ekah 28000 a samhmi cung ah Hakha Lothlo Phu nih dohkalhnak lamzawh ding in January 21 ni cozah zung ah chiah an chiah tiah kan theih.

Dohkalhnak lamzawh ding in ca an chiahmi cung ah an langhtermi cu; Minung 500 thazaang he January 25, Hakha Khuathar sang, Thantlang lampial in zingka suimilam 10:00 ah thawk i Bogyoke lampi thluan zulh in Chin ramkulh cozah zung hmai in Vomtumaung certual tiang zanlei suimilam 4:00 ah dihter ding ti a si. Lamzawh halnak ca chung ah min langhtermi cu minung 9 an si, cu chung in hruaitu lutlai bik cu MP hlun Pi Za Tlem a si.

A luancia 2018 kum ahkhan ekah 100 innhmun an rak samh bal cang. Tutan ekah 600 renglo samh an timhmi he cun ekah 700 renglo a si lai. Cozah nih innhmun samh a timhmi vawlei hmun chung ahhin pupa ram tampi aa tel chih tiah theih a si.

Lamzawh ding halnak catlen (copy) cu President zung (Naypyidaw), Naypyidaw Council- Chairman, Ramkomh Pyihtayzi ministry zung (Naypyidaw) le Hakha hrambunh tualchung media pathum sin zong ah an pek chih.

Lamzawh tik catar put ding ah catial an timhmi cu;
1. Langhngannak a um lomi town plan kan herh lo
2. Upadi phungtang riantuan lawng kan duh
3. Tlangcung lothlotu hna covo runven ding
4. Lothlotu hna nunnak cawisan ding
5. Chin ramkulh cozah nih rampi nih a sermi vawlei hmun upadi phunglam tlingte in zulh ding
6. Phungninglo vawlei chuhmi pawl vawlei hmun ngeitu hna sin ah rianrang in ap than ding
7. Pupa ro vawlei hmun hna le lothlotu hna zapi ngeihmi vawlei runven ding timi an si.

Lamzawh pah in aupi an timhmi hna cabia cu;
1. Upadi tang in riantuan ding
2. Tlangcung lothlotu hna covo runven ding
3. Lothlotu hna nunnak cawisan ding
4. Chin ramkulh cozah nih rampi nih a sermi vawlei hmun upadi phunglam tlingte in zulh ding
5. Phungninglo vawlei chuhmi pawl vawlei hmun ngeitu hna sin ah rianrang in ap than ding
6. Pupa ro vawlei hmun hna le lothlotu hna zapi ngeihmi vawlei runven ding timi an si.
7. Chin ramkulh chung ziknawh eihmuar hmangmi riantuantu paoh dohkalh ding
8. Chin ramkulh chung vawlei hmun buainak tawlrel tikah Chin nunphung upat le hman ding
9. Langhngannak a um lomi town plan kan herh lo
10. Rampi ruahnak petu hmai ah kan tawlrel lai ti riangmang i a hnu ah tawlrelpiak lo ti hi an si.

“Hakha cu Chin khualipi a si ca le inn ngei lo innhlang an tamtuk caah ekah 676 innhmun thar kan samh lai. Atu hi town plan zohthiam le tuahthiam nih an zoh cuahmah lio a si. Atu hmun kan samh tiknak hmun hi Cawbuk le CCU pawng hrawnghrang khi a si. Zeitindah innhmun pek le samh a si lai timi cu biakhiahnak kan tuah rih lo. Innhmun hi alak (free) in pek awk an tha lai lo. A tlawmbik ks. sing 5 asiloah sing 10 (1,000,000) paoh cu laak an si te lai. Innhmun a that deuhnak cheukhat hoihna cu ks. sing 20 in ks. sing 50 tiang zong a phan te kho men” tiah Chin ramkulh cozah bu in chimnak nawlngeitu Minister U Soe Htet nih The Chinland Post ah a chim.

“Hakha Town Plan caah mizapi ngeihmi hmun ekah 600 renglo cu cozah chawva caah Chin ramkulh cozah nih Chin miphun sin lawng ah si lo in miphun dang Kawl mirum sin ah zuar an timh. Hihi, kan Hakha vawlei hmun a thatnak bik le a sathawtnak bikbik hmun an si. Hiti miphun dang nih kan ram ah vawlei hmun an ngeih ding cu ka duh bak lo. Federal kan ngah hlan i kan Chinram ah miphun dang nih vawlei hmun a thatnak bikbik an ngah hnga ding a si cun vawlei hmun hi tongh lo le samh lo in um rih hna sehlaw ti ka duh. Cuti si lo in kan vawlei cia ah miphun dang vawlei hmun an pek hna ding a si cun daite in um awk a tha lai lo, fakpi in kan dohkalh lai” tiah MP hlun Pi Za Tlem nih January 17 ahkhan The Chinland Post ah a rak chim cang.

About The Author

Na ruahning rak langhter ve.. (Leave a comment)

%d bloggers like this: