Hakha Ah Kachin Ralzaam Bawmchantu Phu Chin Tiah Committee An Dirh

City Hunter| 2018 May 9| Atu lio Kawl ralkap le KIA i kahdohnak ruang ah harnak a tongmi Kachin miphun bawmhchanhnak caah ti in May 7 zan Hakha ah ‘Kachin Ralzaam Bawmchantu Phu Chin’ ti in committee an dirh. Hakha mizapi sin ah tlawmhalnak tuah in hartongmi Kachin ralzaam pawl bawmhchanhnak an pek hna lai tiah kan theih.

Committee haotu Salai Lal Nun Tluang nih, “Hartongmi Kachin ralzaam bawmhchanhnak caah lakhruak in Hakha ah committee kan dirh. Hakha khuapi chung ah May 14-20 tiang innkip ah lut in tlawmhalnak kan tuah hna lai. Cuti tlawmhalnak tuah ding in atu hi tualchung media le Khrihfabu kip ah thawngthanhnak le bawmhhalnak kan tuah cuahmah lio hna a si. Cucaah, Kachin ralzaam kan unau hna caah pumpak in siseh, chungkhar in siseh, mibu le Khrihfabu in siseh ‘Kachin Ralzaam Bawmchantu Phu Chin’ timi sin ah aho paoh nih bawmhnak pek khawh kan si. Cun, May 14-20 kar inn kip kan in lenkai hna tik zong ah Kachin ralzaam hna siaherhnak le dawtnak lungput he kut nan kan samhpiak cio naklai kan in nawl hna” tiah The Chinland Post ah a chim.

“Hi Kachin Ralzaam bawmchantu Phu Chin timi committee hi Hakha lawng ah dirh a si lo, Malaysia, Australia, Singapore, India-Aizawl, Kalay, Falam le Mindat zong ah an rak dirh cio. Hi committee dirhnak a thawktu cu Lai Nusal timi a si. Malaysia siseh, Hakha siseh, Kalay siseh hmunkip in committee nih kan hmuhmi cio kha kanmahte in bawmhnak kan pek cio ve ko lai, hmunkhat ah kan fonh lai lo. Innkip tlawmhalnak tuah tikah a biapi in Hakha sianghleirun siangngakchia (Hakha University Student Organization) an si te lai. Hakha nu le pa le khrihfabu kip nih lunglawmte in innka nan kan onh i nanmah le ti khawh tawk cio he kut nan rak samh cio naklai media sin in thawng kan in thanh hna” tiah a biapeh ah a chimchap.

Tuzarh chung ah mizapi sin le Khrihfabu kip ah thawngthanh in hmaizarh nikhat ni (May 14) in innkip lenkainak le tlawmhalnak cu an thawk te lai. Atu bantuk in committee an dirhmi cu lakhruak in Kachin Ralzaam bawmhchanhnak ca te lawng ah an dirhmi a si tiah kan theih.

Inn le lo a chuahtakmi, a zaamtakmi Kachin ralzaam zapi hi 100,000 hrawng an si cang tiah Aljazeera media nih a langhter.

Hakha, ‘Kachin Ralzaam Bawmchantu Phu Chin’ committee upa hna cu; Chairman ah Salai Lal Nun Tluang, Chairman bawmtu ah Salai Lian Bawi, Secretary ah Salai Chan hnin Thang, Secretary bawmtu ah Salai Johnret Thang, Treasurer ah Mai Ngun Thlia, Treasurer bawmtu ah Mai Tial Tha Chin, Treasurer bawmtu ah Salai Bawi Vel Sang, Accountant ah Salai Biak Peng Thang, Accountant bawmtu ah Mai Sung Chin Thluai le Salai Van Tin Sang, Ruahnak petu ah Salai Holy Tawk Tling Thang, Salai Jacob Thang le Rev. Tluang Ceu an si tiah kan theih.

Pehtlaihnak:
Salai Lal Nun Tluang (09263915101)
Salai Chan Hnin Thang (09260984585)
‘Kachin Ralzaam Bawmchantu Phu Chin’
Hakha, Chin State

Na ruahning rak langhter ve.. (Leave a comment)

%d bloggers like this: