Haithlan Tilionak Pawng Ah Khamh Cung Lian Hri Aa Awk
Tawk Tling Thang| 2019 February 27| February 27 zingka,Chin ramkulh, Hakha khuapi chung, Haithlan ah Tikhuangtum khuami Khamh Cung Lian hri aa awk i a thi tiah kan theih.
Hi kong he pehtlai in Pi Ram Pen nih, “Aho a si kan hngal lo, Haithlan tilionak pawng Pa Thawng thlaam sak liomi ah hri aa awkmi ruak kan hmuh i khuabawi Pu Far Kam kan chawnh colh” tiah The Chinland Post ah a chim.
Khuabawi Pu Far Kam nih, “phone an kan chawnh cangka palek thawng ka thanh colh ve hna. Haithlan Pi Ram Pen thlaam pawng ah an sak liomi thlaam chung ah nylon hri a hringmi a fa nawnmite in hri cu aa awk. A pawng ah India cycle (Suzaki) zong a um. A phone a um chih i kan call chawnh tikah ah Tikhuangtum in a nule nih an rak tlaih. Cu tikah mah hri aa awkmi hi kanmah fa a si ko tiah fehternak an tuah. Atu hi motor kan cah hna i a phak i sii-inn ah chekhlatnak kan tuah lai. Hri aa awk an hmuhmi hi tuzing suimilam 9:30 hrawng ah a si” tiah The Chinland Post ah a chim.
Hi kong he pehtlai in Tikhuangtum lei The Chinland Post nih pehtlaihnak kan tuah hna i, “Asi, hri aa awkmi kha kanmah fa a si ko. A min ah Khamh Cung Lian (kum 21) a si. Atu hi CCU (Chin Christian University) ah Dip.Th a kumkhatnak a kai liomi a si. Thaizing hi camipuai tuahding an si cang. Fapa pahnih kan ngeihmi lakah upa deuh a si. Amah hi atu bantuk lungzawt phunphai zong hi cu hlan ahcun a ngei bal lo. Atu bantuk in thil a cang cu kan khuaruah a har hringhran ko. Zeiruang ah dah a si hnga timi a ruah awk kan hngal bak lo. Thawng an van kan thanh cu kan lau tuk hringhran. Kan i zumh kho lei lo” tiah Hringtu a nu nih The Chinland Post ah a chim.
Hi kong he pehtlai in Hakha palek zung in tuanvo ngeitu pakhat nih, “A thimi ruak hi zeitindah a thihning a si timi sii-inn ah chekhlat i a herhning in ahmuh (case) tuah a hau. Cu dih hnu lawng ah a ruak hi laak khawh a si te lai” tiah The Chinland Post ah a chim.
Khamh Cung Lian hi Rangoon ah bible sianginn kumhnih a kai hnu ah Hakha, CCU ah a kumkhatnak in a kai a thanmi a si. Pu No Tler le Pi Tuan Zi fapa, Tikhuangtum khuami a si. Hri aa awknak hmun i a cycle chung ah cycle license zong aum chih. Cycle license ngeitu min cu Dawrthar sang Van Hlun Thang ti a si tiah kan theih.
A ruak hi Hakha sii-inn ah chekhlatnak an tuah dih hnu lawng ah laak khawh le khua lei ah tlunpi khawh a si tiah lai tiah kan theih.
About The Author
