Hakha Ah Ks. Sing 8300 Dih In A Hmasa Bik 3 Star Hotel An Sak Cuahmah

0

Hakha 3 star hotel sak liomi

Salai Cung Cung|2018 July 5| Hakha ah Mercy Par Company nih Gangaw lam Bus Terminal tuahnak ding thlang ah Ks. Sing 8300 hrawng dih in 3 Star Hotel an sak cuahmah tiah kan theih.

Hakha ah 3 star hotel an sak cuahmah liomi

Hi kong he pehtlai in Chin ramkulh Investment lei zung in Director Dr. Min Zaw Oo nih, “Mercy Par Company nih Hakha ah an sak dingmi hi 3 Star Hotel a si lai. Kumkhat chung lim ding in rian zong an thawk cang. Chinram cozah hnatlakpinak he anmah vawlei hmunhma te ah anmah thazaang te in an sakmi a si. Hotel hi dot thum a si lai i akhaan 38 aa tel lai” tiah The Chinland Post ah a chim.

Hakha ah 3 star hotel an sak cuahmah liomi

Hotel satu Mercy Par company ngeitu Pu Thawng Kian nih, “Hotel hi sak hram kan domh cang. Ks. sing 8300 hrawng dih ding in kan tuak. Mah nak tamdeuh zong a dih kho. Ks. sing 8300 hi cu a tlangpi lawng in a si, adikthliar a si lo. Keimah vawlei hmunhma te ah 3 star hotel cu ka sakmi a si. Atu hi a tang foundation cu kan lim deng cang. Kumkhat chung lim ding in kan sak cuahmah” tiah The Chinland Post ah a chim.

Hakha ah 3 Star Hotel sak liomi kong he pehtlai in Chin ramkulh Sipin zung in Director Pu Thla Hre nih atu bantuk in The Chinland Post ah a chim.

Hakha ah 3 star hotel an sak cuahmah liomi

“Hi hotel hi cozah bawmhnak tel lo anmah thazaang te in an sakmi a si. Hotel saknak hmun hi cozah nih thate in license an pekmi amah vawlei hmunhma te a si, ekah 4 hrawng a kau. Cozah hlun chan i rak sakmi Kanpetlet le Mindat hotel chim lo in cozah thar chan ah Laitlang ah a hmasa bik 3 Star Hotel sakmi a si lai. Amah belte atu Chin ramkulh hluttaw zungpi sak liomi pawng i guest house sak liomi khi 3 star hotel dirhmun in sakmi a si ve.”

Hakha ah 3 star hotel an sak cuahmah liomi

Hakha in nitlaklei Golf Cup pawng Nawi hrwng ahkhin cozah lei tawlrelnak le hmunhma peknak in hotel sak aa timmi company pathum an um. Cu hna cu; King Solomon company, KL Amazing company le Chainthar Shwemi company an si. Cozah lei he hnatlaknak le biahren an tuah khawh rih lo caah rian an thawk kho rih lo tiah kan theih.

Hakha ah 3 star hotel an sak cuahmah liomi

Atu lio Hakha ah private ngeihmi guest house 8 a um. Cu hna cu; Zwe, Rung, Mingalar, Grace, Cherry, Junction, Shalom le Centre an si. Hotel pakhat hmanh a um rih lo. +++

About The Author

Na ruahning rak langhter ve.. (Leave a comment)

%d bloggers like this: