Hakha Ah Kum 7 Ngakchia A Tlaihhremtu Pa Cu Kalay Ah An Kuat

0

City Hunter| 2018 April 10| April 8 zanlei, Hakha ah kum 35 a simi U Khin Maung Tun nih kum 7 a simi Chin ngakchia a tlaihhrem. A tlaihhremtu kum 35 a simi Kawlpa cu April 10 zingka ahkhan Hakha palek zung nih Hakha in Kalay ah an kuat tiah kan theih.

Hi kong he pehtlai in Hakha palek zung in sakhaanhmu Duh-Ye-Oh U Thein Zaw Oo nih atu bantuk in The Chinland Post ah a chim.

“A tlaihhremtu kum 35 pa he tlaihhremmi kum 7 ngakchia pa he Hakha sii-inn an phan veve. Kumtlinglo ngakchiapa a tlaihhrem ruang ah tlaihhremtu kum 35 pa hi an velh ruang ah sii-inn a phak venak hi a si. A ruh fak ngai in aa hliam i Hakha ah ruh siibawi thiam an um lo caah tu zingka (April 10) ahkhan palek nih Kalay sii-inn ah an kalpi. Tlaihhremtu pa a dirhmun cu atu hi sii-inn ah thongthlak khi a si. Sii-inn zong ah palek nih felfaite in an congh lai. Sii-inn a chuah cangka asilole a dam deuh in tazacuai a si colh lai.”

“Ngakchiapa cu atu hi sii-inn ah an thlop liopi a si. Ngakchiapa a lungrawh lonakding, a lungzor lonak le a limhang a tlak lonak ding hi mi zei paoh nih humzual le hmailei nunhim, thanchonak ding kilven le dirkamh a herh. Ngakchiapa hi mi zeidah a si, khuazei ah dah a um tibantuk amah he a chungkhar kong he langhter lo ding hi zapi tuanvo kan ngei” tiah Sakhaanhmu U Thein Zaw Oo nih a chimchih.

U Khin Maung Tun hi Hakha khua cozah zung pakhat ah caphawtu rian a tuan liomi, Kawl a si. Hakha a umnak a sau cang i an innpa he ngamhtlak in a ummi a si. Innpa he an i ngamhtlak ruang ah ngakchia pa cu a don, a thlah tawn i atu bantuk in a tlaihhrem khawhnak hi a si tiah kan theih.

Hi thil a cangmi kong he pehtlai in April 10 chun, HRC (Hakha Rescue Committee) zung ah Unicef, Save The Children telh in Hakha zatlang mibu (CSOs) pawl ton biaruahnak an ngei. Cu lio ahcun Unicef in Technical Adviser Anu Sung nih atu bantuk in a chim.

“Hi kong ah tlaihhremtu pa kong hi biapi ah kan chia lo. Ngakchiapa hi a limhang a tlak lonak ding le nunrawh- lungdongh in a lungput a zornak hnga lo, zeitindah kan kilven lai i zeitindah a hmailei kong thatnak ding kan tawlrelpiak lai timi tu hi a biapi taktakmi a si. Hi kong ah cozah lei zatlang nunchanhnak zung (lu-hmuh-vuan-htan) siseh, Chin ramkulh Social Affair Minister Pau Lun Min Thang zong kan chawnhbiak cang. Kan chim ngammi pakhat cu tlaihhremtu pa hi a luat hrimhrim lai lo, upadi ning in an kan tawlrelpiak hrimhrim ko lai. Cucaah, a biapimi cu ngakchiapa a hmailei kong hi a si.”

Unicef in Chin ramkulh tuanvo ngeitu pakkhat zong nih, “Atu bantuk tlaihhremnak case hi Chinram ah a tampi cang. Tutan hi voidang nakin a linsa deuh. Atu hi avoi khatnak lawng a si lo. A cheu cu chungkhat le chungkhat, tu le fa hna an si. Upadi he aa tlak in dantatnak tuah lo in anmah le anmah i rem than lengmang. Cucaah, hi bantuk case kan doh lai ti ahcun i rem lo in upadi ning in dantat hi a tha bik” tiah HRC zung ton biaruahnak ngeih lio ah a chim.

Hi kong ah KMSS nih biatakte in upadi zohchih in hmalaknak an ngeih cuahmah. Cozah lei nih upadi he aa tlak in hmalaknak an tuah hlan lo, fakpi in aupi le cawlcangh an i tim tiah tuanvo ngeitu upa hna sin in kan theih.

Hi ngakchia a tlaihhremtu U Khin Maung Tun nih atu voikhat lawng si lo in voi 7 tiang a tlaihhrem cang i na chim ahcun kan thah lai tiah a rak tlerh caah ngakchiapa nih a rak chim ngam lo. A tlaihhrem lio an hmuh hna hnu in ngakchiapa nih a chim hi a si. Ngakchiapa a tlaihhrem lio a hmutu pa nih a thinhun tuk ruang ah U Khin Maung Tun cu a velh i Hakha sii-inn a phan.

Nihin Myanmar ram ah ngakchia kumtlinglo a tlaihhremtu hna cu thih dan pek ding tiah an aupi cuahmah lio a si. Cu ruang ah atu thilcang kong ah zeitindah an tawlrel lai ti cu fiang in hngalh khawh a si rih lo. Anmah palek tu nih cun upadi he aa tlak in tawlrel a si ko lai tiah The Chinland Post ah an chim.

Biakilh: Tlaihhrem a tongmi ngakchiapa a pumpak kong runvennak caah a umnak sang, mi zei dah a si, zei tuah liomi dah a si tibantuk amah pumpak le a chungkhar kong kan hun langhter lonak hi a si.

About The Author

Na ruahning rak langhter ve.. (Leave a comment)

%d bloggers like this: