Hakha Ah Lunghrinhmi Minung Pathum Palek Nih An Tlaih Hna
The Chinland Post |2019 August 27| Hakha ah pa pathum cu August 27 zaan sumilam 11 hnu ah Hakha pelek le Hakha mino hna nih an tlaih hna tiah kan theih.
“Hi minung pathum kan tlaihmi hna cu tu tiang kanmah nih kan chekfel mi chung ah cun zei hmanh an tuahmi a lang rih lo. Hi minung pathum cu zaan tlai hnu ah Hakha khuachung kilvennak duty ciahmi le sang mino hna nih an hmuh hna i an zumh hna lo caah an tlaih hna. Adang pakhat khat thil an tuah sual ah tiin palek zung ah an rak ap hna. Hi minung pathum cu palek nih case kan hunpiak hna i (palek sin ap poh-mah 35 ( ယ ) in biaceih zung ah taza an cuai hna” tiah Hakha peng palek bawi U Khin Mg Myint nih The Chinland Post ah a chim.
“Hi kan tlaihmi hna cu August 28 tu zing biaceih zung ah kan kuat hna lai. Kannih cu zaan tlai hnu chekfelnak kan tuah lio le sang upa hna nih zaantlai chekfelnak an tuah lio ah tubantuk in lunghrinhmi pawl an tlaihmi hna hi tampi in dantatnak kan pek khawh peng ah cun mizapi zong an him lai i khua le ram zong a him lai. Cucaah mizapi zong kanmah palek he i bawmh cio ding in sawm kan duh hna. Hi minung pathum cu tu tiang ah cun thil an tuah sual mi kan mah lei in cun kan hmu rih hna lo. Biaceih zung nih a chekfel hnu lawng ah a lang dih te lai” tiah Palek bawi U Khin Mg Myint nih a chim chap.
Hi minung pathum an tlaihmi hna cu, Van Cung Hnin kum 19, Hram Zel kum 35, Bawi Za Kam- kum 28 an si tiah Hakha peng Palek zung in kan theih.
Hmanthlak: Keihsih Mino Bu
