Hakha Ah Minthang Lai Ral Lungphun Cu December In Tuan hram An Thawk Lai

Lai Ral Kong Lungphun tu Yangon Lai Chiatthat Bu le Hluttaw, Cozah Lei Upa Cheukhat

Salai CungCung|2019 October 17| Hakha Viewpoint ah Minthang Lairal Lungphun tuah ding in October 14 ah tonpumhnak an ngei hna i December thla thawk in tuanhram thawk ding timhtuahnak an ngei tiah kan theih.

“Tu hi khua kan khan lio pi a si, tangka tlamtling in kan hmuh kho rih lo zong ah December thla ah cun kan thawk cang lai. Chin Miphun Ni (Chin Naitonal Day) 2020 caan Hakha ah hunnak tuah khawh seh ti kan duh. Tu hi a tuanbia le a ca tete tialtu ding ah tuanvo kan pek cang hna. Min cazin hi tutiang lak mi ahhin 86 tiang kan hmuh, mahhnu zong ahhin ai chap te lai maw ti cu fiang rih lo. Cun tangka kawltu zong tuanvo kan i pek cang hna. Ramchung ramleng he bawmh an hal hna lai. Tu hi bawmh mi cu tampi a chuak rih lo an tawlrel lio pi a si” tiah Minthang Lai Ral Lungphun Committee Chairman Pu Thla Hre nih The Chinland Post ah a chim.

“October 14 ah khan Chin ramkulh Hluttaw zung ah The Famous Hakha Rebellion lungphun tuanchuak tuanvo ngei tu committee tonpumhnak kan tuah i a ralai mi December thla ah tuan thawk kan i tim. Hi tuannak caah hin kan Laimi chung in nun siang hna thazaang bomh halnak in tuan a si lai. Meeting kan sawmmi hna cu tuanbia hngaltu kan pa le a si mi Pu Huat Chum, Pu Chan Pum le Pu Lian Kim nih a kan tel pi i ruahnak le thazaang peknak a kan ngei khawh” tiah  Pu Thla Hre nih The Chinland Post ah a chim.

“August 28, 2019 ni ah minthang Lai Ral Lungphun, phun ding ah Committee kan ser. Hi lungphun nak ah hin cozah sin tangka bawmhnak hal lo in kan mah Miphun a si mi, Miphun le ram caah nun siangmi ramchung, ramleng sin ah mah le si khawh tawk  bawmh kan hal hna lai . Hi lungphun cu Sipin Engineer nih Design an suai lai i a tlawmbik pee 30 a sang lai.  Cungbik ah Minthang Lai Ral lungphun tiin kan tial lai i  a tang ah Lai ralkap pawl 80 leng a rak thi mi le thongtla mi pawl vial te kha an min  rolung ah kan tial dih hna lai kan ti. Hi  lung phunnak ding ah kan mah kan i timh ning ah cun Sing 250 le Sing 300 kar hi dih seh law ti in timh tuahnak kan ngei. Hi bawmhnak hal mi ah hin kan mah Laimi phunchung lawng in a si lai” tiah a chim chap.

Hi Lairal Min Thang lungphun ding ah Committee chungtel hna cu; Chairman ah Pu Thla Hre, Vice Chairman ah Pu Ngun Sang Aung le Pu Tial Ling, Secretary Pu  Khin Maung Win, Assistant Secretary Pu Chum Ling, Treasurer Pu Tam Aung Shing, Joint Treasurer Pu Lian Iap, EC chungtel ah minung 10 an si tiah kan theih.+++

 

Na ruahning rak langhter ve.. (Leave a comment)

%d bloggers like this: