Hakha ah Minung 3 Cu Thongthlak Ding In Bia An Khiah Hna
The Chinland Post | 2023 October 3 — Chin ramkulh, Hakha khua ah minung 3 cu SAC ralkap nih thongthlak ding in bia an khiah hna tiah SAC leiṭang Telegram Channel nih an langhter.
Atu bantuk in thongthlak ding in bia an khiah mi hna hi Pi Biak Mawi Sung, Pa Van Biak Ceu le Maung Nge hna an si tiah theih a si.
Pi Biak Mawi Sung hi CDF pawl tangka a bawmh hna tiah Article 50-J {ပုဒ်မ ၅၀ (ည)} in taza an cuai i nunchung thongtla ding tiah bia an khiah tiah theih a si.
Pa Van Biak Ceu hi Hakha khua ah a um mi a si i Thantlang khua ah hmunhma a khuar mi CDF pawl a inn ah an ṭhumhter hna leng ah hriam cawknak caah India, Mizoram, Siaha khua ah kal kho ding in lam a hmuhsak hna i bia a lehpiak hna caah Article 52-A {ပုဒ်မ (က)} in thong kum 7 thlak ding in bia an khiah ve.
Cun Maung Nge hi Hakha University tual chung ah lut in sianginn thilri pawl voi tampi a fir caah Article 61 in thong kum 7 le rianhrang ṭuan ding in bia an khiah ve.
Atulio hi Hakha khua hrambunh SAC ralkap le palek pawl nih sang cheukhat chung mipi inn cheukhat lut in chungkhar cazin an chek hna i သန်းခေါင်စာရင်း an kholh tiah khuami hna nih The Chinland Post ah an chim
