Hakha ah Minung 5000 tlum mi Chin Convention Center An Sak Lai

Salai Bawi Lian Sang| TCP-Kalay| November 21, 2020| Hakha khua 2015kum kokek mincimh philhlonak ah hlan pu/pa run-inn bantuk in minung (5000) tlum mi Chin Convention Center cu covid-19 pulrai zawtnak a thiang dih tik ah Hakha thar sang um Hakha Khrihfabu kip fonh innhmun ah sak an timh tiah theih a si.

Rev. Dr. Za That-GS (CACC-Chin Assocation For Christian Communication) nih “Mah Inn pi cu Hakha Khrihfabu kip fonh inn hmun ah Pe 160 kauh in sak kan timh. Mah hall sak nak ah Ramchung ramleng um Chin Baptist Khrihfabu member kip nih tangka thawhcio in Us$ 2.5 million (Kyat-sing 30,000)dih in sak ding a si lai” tiah a chim.

Cun,“2015 kum Hakha mincimhnak philhlonak ah mah hall hi sak kan timh mi a si. Hlan pu/pa run inn bantuk te in sak a si lai. Vunzoh tik ah mah hi Chin inn a si tiah theih cawlh ding le Chin mi sinak langhter mi design phun a si lai. Chin miphun vial te nih miphun kong, biaknak kong, he pehtlai in meeting tuahnak le conference te hna tuah tik ah hmangkho cio ding in timhnak he mah Hall inn pi cu sak a si lai. Hakha ah Minung (1000) tluk tlummi biaknak lei inn a um rih lo. Mah Hall pi ah hin minung (3000) an i tlum lai. Hall a lenglei veranda lei ah minung (2000) tlum a si lai. Minung dihlak (5000) tlum ding mi hall a si lai. Cun motor (200) hlei car parking um ding in sak a si lai” tiah a chim.

Hall saknak can cu kum 3-4 a rau lai i covid pulrai a thiang dih in Myanmar ram level in tender auh nak ca chuah in sak a si lai tiah theih a si. Ref: IPRD/ Hakha