Hakha Ah Mizo Holh In A Holhmi Pa Nih Dawrkhan Pathum Ah Tangka A Fir Cang

0

Salai Cung Cung |2019 February 13| Hakha ah Mizo holh in a holh mipa nih zatlang lampi cung ah a ummi Dawrkhan a bauh i dawrkhan pathum ah tangka a fir manh cang tiah kan theih.

“February 12 zaanlei suimilam 4:30 hrawng ah ka dawr thil cawk ding in a ra i kei inn leng ka chuah kar ah a mah te lawng dawrkhan ah a rak lut. Keimah ka rak tik cu zei na duh lai ti ka vun hal. Angki cawk ka duh zeizat dah si lai a ka ti. A man cu ka chim hnu ah ka nu le nih tangka an ka pe rih lo, inn ah ka va la ta lai i a hnu ah ka ra than te lai tiin Mizo holh a ka ti. Cu a kal tlawmpal ah ka dawrkhan tangka chiahnak bawm ka vun zoh tik cu a rak i hung. Ka vun zoh tik cu tangka ka chiahmi a ka lakpiak dih” tiah Dawr ngeitu Nwe Nwe nu nih The Chinland Post a chim.

“Hakha dawr ngeitu le inn ngeitu hna ralring tein um cio hna sih. Hi mifir pa hi No Ling Guest House ah aa thum mi a si. Guest House ah ka va kal i ka va hlat tik ahcun cu pa cun guest house in a rak chuak manh cang i pehtlaihnak kan hngal kho ti lo. Hi mifirpa cu kum 29 hrawng minung a si i tu hi Hakha Dawrkhan pathum hrawng ah tangka a fir cang” tiah a chim chap.

Hika ah Za Tawng nu dawr a bauh hnik lio CCTV nih a thlakmi The Hakha Post nih an tarmi video zoh khawh a si.

Mizo holh in a holhmi mifir pa hi February 10 hrawng ah khan Mi Nge dawr zong ah tangka 50,000 le Vok chungril zuarnak (Cherry te) dawr ah 50,000, Za Tawng Nu Dawr ah Sing 12 a fir cang tiah kan theih.

Tangka a firpiakmi hna dawr pahnih hi Hakha Pyidawta sang Bogyoke lampi cung ah a ummi le dawrkhat hi Dawrthar sang, Bogyoke lampi cung ah a um ve mi a si.

Video: The Hakha Post facebook

Biakilh: Hmanthlak hi tutan mifir pa hmanthlak a si lo, cu hlan ah Hakha ah thil firnak hmanthlak dang a si.

About The Author

Na ruahning rak langhter ve.. (Leave a comment)

%d bloggers like this: