Hakha Ah Ngakchia A Tlaihhrem Tiin Tazacuaimi Ko Htun Nih Amah A Veltu Ngakchia Pa A U Taza A Cuai Ve Than

0

Salai Ngun San Aung| 2018 May 2| Hakha ah Social Affairs Zung i rian a tuanmi kawlpa Ko Htun cu April 8 ah khan kumtlinglo ngakchia pa a tlaihhrem tiin ngakchia pa i a upa nih sii-inn phan lak a velh i taza zong cuai beh a rak si.

Hi ngakchia pa hi kum 7 hrawng minung lawng a si rih. Ngakchia pa a tlaihhrem tiin ngakchia pa a upa nih a velh caah a lu hmun hnih in a kuai i a ban khatlei zong aa khong. Cun palek sinah report tuah in tazacuai a si. Asinain amah Ko Htun nih cun a tlaihhrem le tlaihhrem taktak lo kongah zeihmanh a chim duh lo lengah Dawrthar sang ummi an si caah Dawrthar khuabawi le Social Affairs zung in a hawipa nih hngalhpinak min an thutpiak i a ka veltu hi keimah lungtho tein ka ngaihthiam, taza ka cuai lai lo tiah palek sinah biakamnak a rak tuah. Sihmanhsehlaw tu cu a lung aa thleng than i a veltu cu Ko Htun nih taza a cuai ve than tiah kan theih.

Hi kong ah ngakchia pa a u nu nih, “ka tapa kha taza a cuai than rua. Hakha palek sakhan in hi kong ahmuh a dawitu nu pakhat nih taza an cuai hna tiah a rak kan chimh. Ka tapa cu biaceihzung nih a sual ko hei ti hna sehlaw zeitluk dah dantatnak a ing ding a si tiah ka hal tikah kum ruk sarih paoh thong a tla kho tiah a ka leh. Asiah cucu zeitin tal dantatnak tlawmter khawh deuh ding lam a um maw tiah ka hal than i cucu nan duh asile taza nan cuai mi pa kha hei rem than ulaw si ko, cu hlei lam dang aum lo tiah a ka leh. Hi bantuk in anmah palek lei nih tlerkhonh bantuk in an kan timi cu ka lung tha lo ngai” tiah TCP ah a chim.

“Ko Htun nih a veltu kha taza a cuai ve hna. A hlan ahcun ka cuai hna lai lo tiah a rak ti ko nain a lung aa thleng. Hihi a ngah mi a si, amah thinlung ah aa hngat. Taza a cuainak cu Yazathatgyi Pohmah 325 in a si i upadi cauk chungah aa tial ning ahcun kum nga tiang thong thlak khawh a si. Cun kumkhat maw thlaruk maw tibantuk lawng zong a si kho. Pohmah 325 cu faktuk in taksa fahter nak ruangah sualpuhnak a si caah a hma kha a fah le a din siibawi te nih an hmuhning cungah a dantatnak cu aa hngat ding khi a si. Hi a hmuh hi tu thla 7 ah biaceih zung ah kan ap lai i zeitik ah dik an bia an ceih te hna hnga a fiang rih lo” tiah Hakha peng palek sakhan hmu nih a chim.

Hi kong he pehtlai in Sihni Pu Chan Pum kan hal tikah, “Kawlpa nih a veltu a report than vemi hi ka report lai lo tiah min a rak thut cang zongah a lung aa thlen ahcun a ngahmi a si ko. Cun ngakchia a tlaihrem tu hi thonginn ah an hren ko ti a si caah lungretheih ding a si lo. Hi bantuk cu sining aa khat lomi cungah tuahmi sualnak ti a si i tlaihhrem sawhsawh he zong aa lo lo. Biaceih zung nih a sual ko tiah an ti ahcun thih hlan lo thong asilole kum 10 thong le tangka dantat chih timi pahnih chungah pakhat paoh hi a ton dingmi dantatnak a si lai” tiah a chim.

Ngakchia pa hi a tlaihrem tak tak maw timi siibawi te nih ngakchiapa takpum cungah an chek ko nain sii-inn uktu siibawi pa lawng nih minthut in an hmuhmi result chuahpi khawh a si caah zarhthum tluk a rau cang mi ngakchia chia pa an cheknak result cu a chuak rih lo. Sii-inn uktu pa khual a tlawng ti a si.

About The Author

Na ruahning rak langhter ve.. (Leave a comment)

%d bloggers like this: