Hakha Ah Pi Mang Tin Ci Te Inn A Kaang; Putar A Zengmi An Chanh Manh

0

City Hunter| 2018 April 2| Hakha, Dawrthar sang, Shalom Guest House pawng ah a ummi Pi Mang Tin Ci te inn cu April 2, chun suimilam 2:00 tluk ah a kaang. Inn a kangh lio ah innchung ah putar a zengmi Pu Len Kham cu mei nih a hliam manh hlan ah an chuah manh tiah kan theih.

Pi Mang Tin Ci te inn hi tlakrawh (taih-inn) dothnih a si, a ningpi in anmah chungkhar an um dih. Inn hi zeitindah a kangh ning a si timi fiangte in hngalh a si lo. Inn cu inncung dot (dothnihnak) in kaang hram aa thawk. Inn a kangh lio ahhin inncung ah an pa Pu Len Kham kum 60 renglo a si cangmi a um. Amah hi lam a kal kho ti lomi a zengmi a si. Putar cu innpa chakthlang nih innleng ah an chuah manh. Inn cu innchunglei cu a kaang pah dih ngawt. Meiphelh zung nih inn a kaangmi a ziamh dih hlan ah an phelh khawh than.

Inn ngeitu Pi Mang Tin Ci nih, “Nihin cu kanmah kan um ko. Chuncaw kan eikar ah inn a kaang tiah a kan chimh. Ahote inn dah a si hnga ti kan rak tlik hnawh ahcun kanmah inn a si. Innleng ah mei alh a chuak rih lo, a chunglei in a khu dih. Hi lio ah inncung ah ka pa  cu amah te lawng a um. Vanchiat lei vanthat ah ka pa cu himte in kan chuah manh. Ka pa hi a zennak kum 18 renglo a si cang. Ka khuaruahhar a tuk, zeitindah a kangh khawhning a si hnga timi cu ka ruah tikah ka thluak nih a phan kho bak lo” tiah The Chinland Post ah a chim.

Inn hi zeitindah a kangh ning a si timi cu fiang in hngalh khawh a si lo. Asinain  electric mei sawtnak in a si lai ti hi innpa chakthlang hna le cozah lei upa cheukhat nih an ruahdamhning cu a si. Inn a kaangmi cu suimilam 2:50 ah tlamtlingte in an phelh/ an hmih khawh dih. Hi inn kangh ruang ah aa hliammi le mei nih a hliammi hna an um lo tiah kan theih.

Pi Mang Tin Ci te innchungkhar hi an naule le an tule he an zapi minung 10 tluk khua a sami an si. Pi Mang Tin Ci a pasal cu cozah zung ah rian a tuanmi Pu Ling Naing a si. An umnak inn hi Hakha, Dawrthar sang, Zion biaknak kalnak lam zong a si i Tita lam zong a simi thlang ah a um. Bogyoke lampi cung ah a ummi Shalom Guest House pawng te ah a ummi a si.

“Hi inn a kangh ruang ah pawngkam inn zeihmanh a hnorsuang in a kangh manh lo. Meiphelh motor a ra colh i an hmih khawh colh. An inn hi tlakrawh inn a si ruang ah fawite in a kaang colh kho lo. Thinginn siseh law a ziam dih colh lai innpa ca zong ah tih a rak nung tuk hnga.” tiah sang upa pakhat nih The Chinland Post ah a chim.

Pi Mang Tin Ci te inn cu innchunglei le hreh, vampang tibantuk cu a kaang dih. Thil hi chuah manh lo in a kaangmi a tam. Inn pawng ah an chiahmi thing zong a kaangh chih tiah kan theih.

Hakha ah Pu Khar Nawn inn cu March 25 (Sunday) chun suimilam 2:40 hrawng ah a kaang. A inn ningpi in a ziamh dih manh hlan ah mei an phelh khawh than tiah kan theih.

Pu Khar Nawn inn hi Hakha, Pyidawtha sang, Bogyoke lampi cung- Lunghleiva kam te ah a ummi Hakha lamtonnak (laansone) chak te ah a um. Inn hi dawrkhaan telh chih in dotli a si. Inn a kanghnak hi a dothnihnak in aa thawk.

Inn dothnihnak ah a ummi hi cycle a remhmi Kaung Kyaw te chungkhar an si. Inn dothnihnak a ummi U Kaung Kyaw te coka rawlchuannak pawng-oo in kangh hram aa thawk. Zeitindah a kanghning a si ti cu fiangte in hngalh le fehter khawh rih a si lo. Asinain Pawng-oo rawlchuannak i mei a sawtmi in a kaang timi tu cu hngalh a si. Mei kangh hram aa thawk ahhin anmah Kaung Kyaw te chungkhar innchung ah an um lo. An innchung mei a hut dih hnu le mei aa erh dih hnu lawng ah an theih. Cu cangka cun innpa chakthlang le lam aa chokmi nih baltin in ti an than chommi in an toih. Cu tlawmpal ah Hakah meithat zung in meithat motor pahnih an ra i inn cu a tlaih dih hlan le a kangh dih taktak hlan ah an hmih khawh than. Hi mei kangh ruang ah aa hliammi le a thimi cu an um lo.

About The Author

Na ruahning rak langhter ve.. (Leave a comment)

%d bloggers like this: