Hakha Ah SDO Nih Sing 28, 00 Dih In Senthang Khualbuk An Sak Cuahmah

0

SDO building sak liomi

Salai Cung Cung |2018 July 20|  Hakha langsung IBC Biakinn chak ah SDO (Sumthawng/Senthang Development Organization) nih ks. sing 28, 00 dih in Senthang khualbuk an sak cuamhmah tiah kan theih.

SDO building sak liomi

“Hi saknak dingah hin ramdang um Senthang kan mino hna bawmhnak in sak kan timhtuahmi a si. Atu lio hi tangka kan ngeih rih lo caah Kalay um kanmah Senthang Pu Khen Kil Lian nih a dih chom tein tangka fang akan chuahpiak i kanmah zong nih kan si khawh tawk in kan cham pah lengmang ve. Hi sak hram kan rak thawk cu 2014 May a si. Thal chungah hin ti ahar tuk caah inn satu zong minung 19 leng an si tikah caankarlak chung kan i din nain atu hi cu kan sak than lio pi a si cang. Hi khualbuk hi kanmah kan i tinh ning ah cun 2018 chungah dih in 2019 ah hunnak tuah kho ding in saduh kan that” tiah SDO Director Cung Nawl nih The Chinland Post ah chim.

“Pu Hram Ceu hi mah khualbuk sak lei ah tawireltu Chairman a si i amah nih a timhtuah ning ah cun acung dot hi dotli in kan sak lai tiah a kan ti. Asinain kanmah committee lei in kan thazaang nih a tlinh lai lo kan ti caah dotthum lawng in kan sak ko lai kan ti. Kannih cu committee nih suaining tein kan kal peng ko lai. Rian kan thawkka in nihin tiang zeihmanh buainak le hnahnawhnak kan ngei rih lo” tiah a biapeh ah a chimchap.

SDO building sak liomi

Hi SDO cu 2012 May 6 in an dirh i 2016 March 30 ah cozah hnatlakpinak an hmu. Hi SDO cu project tampi a ngei; project pakhat ah cun tu inn an sakmi hi asi. An riantuan ding ah an i hmaithlak bikmi cu Senthang ah pawngkam zohkhennak riantuan hi a si.

Pawngkam zohkhenhnak rian an tuannak ah Gret nih bawmhnak a pek hna. Hi Gret nih a bawmh hna hlan zongah anmah te in saram pawl kilven ding le tiva ah bomb puah lo ding le thingkung ramkung zohding pawl hi thingram zung le pawngkam zohkhennak zung pawl, KMSS le CARD he tiah rian an tuanqi cang. SDO ah caantling riantuantu hi minung 3 an si i OC committee upa hi minung 11 an si tiah kan theih.

About The Author

Na ruahning rak langhter ve.. (Leave a comment)

%d bloggers like this: