Hakha Ah Tanghra Siangngakchia Pakhat Motor Nih A Pah I Sii-inn A Phan
Salai Cung Cung|2018 October 22| Nihin October 22 chun, Hakha Khuathar Carson Biakinn hmai ah motor Pajero le Cycle an i pah i Cycle Mawngtu pa cu a ke fak tuk in aa khawn caah Hakha Sii-inn ah an kalpi colh tiah kan thieh.
“Hi Motor le Cycle an i pah cu Motor hi a palh deuh ko, zeicatiah motor hi Thantlang lam lei in a ra i a hmai ah motor nganpi thil phormi kha ka lawnh lai a tinak ah lampi a ri an rinmi leng a lonh i lam zulhphung a buar. Cu lio ah tanghra kai liomi siangngakchia pa cu cycle in a ra ve i motor nih lam zulhphung a buar caah cuka ah cun an i pah hi a si. Cun motor ngeitu pa nih Cycle mawngtu pa cu amah motor in Hakha Sii-inn ah a kalpi colh” tiah cu accident lio a hmutu lamkam dawr tuahtu pa nih The Chinland Post ah chim.
“Cycle mawngtu siangngakchia pa hi fak tuk in aa khawn caah a pahtu motor nih Sii-inn ah an tlikpi colh. An i pah lio ah hin Cycle mawngtu pa hi a hmai ah a thi a chuak. Cun a ke hi a kiak ko rua, fak tuk in aa khawng i amahte in a kal khawh lo caah kan thinphang ngai. Anih hi Sianginn kai lio mi te a si” tiah poipang tonnak hmun i a um vemi hna nih The Chinland Post ah an chim.
Hi motor le Cycle an i pah cu October 22 chun suimilam 12 hrawng ah a si i Cycle mawngtu pa hi tanghra kai lio mi a si. Pajero motor mongtu pa hi Thantlang lei a rak tlungmi lam bawi pakhat a si tiah kan theih. Pah a tongmi siangngakchia hi a lung a fim lo caah mi zei dah a si timi fiang in kan hngal kho rih lo.
About The Author
