Hakha Ah Tangkua Camipuai A Sungmi Siangngakchia 68 An Si
Salai Cung| 2018 April 25| Chin ramkulh Hakha ah tukum tangkua camipuai a sungmi 68 an si, camipuai phitter than a um ti lo caah hmaikum tu ah an phi thante lai tiah kan theih.
2017-2018 Chin ramkulh Hakha ah tangkua a phimi zapi hi 736 an si i a sungmi hi 68 an si. Adang KG in tangriat tiang a sungmi an um lo, an awng dih tiah kan theih.
“Hi tangkua a sungmi hna cu tukum ah phitter than an si ti lai lo, hmaikum lei tu ah sianginn kai than lo zong in May thla hramthawk ah an phi thante lai. Hiti tangkua siangngakchia camipuai an sunghnak a ruang bik cu ca an thiam lo tuk caah a si. Mark 100 chungin mark 2, mark 3 te lawng hna an hmu. Cuti mark tlawmte lawng an hmuhnak a ruang pakhat cu sianginn kai an hrokhrol ruang le ca an zoh lo caah a si. Zeitin hmanh in bawmh awk le awnter awk an tha lo. Cuti awnter awk a tha bak lomi siangngakchia paoh kha an sungh dih” tiah BEHS No.3 Vice-principle Pu Chum Er nih The Chinland Post ah a chim.
Tukum Hakha ah KG in tangkua tiang camipuai a phimi le a awngmi hna le a sungmi result cu; BEHS No.1 ah a phimi KG in tangkua tiang hi 2,400 an si i a awngmi 2,358 an si. BEHS No.2 ah a phimi zapi hi 1,027 an si i a awngmi 1,007 an si. BEHS No.2 in Sianginn then Hakha, Seven One Private School ah a phimi 81 an si i a sungmi an um lo. BEHS No. 3 ah a phimi 1,507 an si i a awngmi 1,489 an si tiah tiah kan theih.
BEHS No.1 in tangkua a sungmi 42, BEHS No.2 in tangkua a sungmi 8, BEHS No.3 in tangkua a sungmi 18 an si, an zapi 68 an si. Tukum tluk in tangkua a sungmi siangngakchia an tam bal lo tiah kan theih.
About The Author
