Hakha Ah TSDP Min Bunh In Mini Marathon Tlikzuamnak Ah Hung Man Le Hanah Nih Pakhatnak An Ngah

Photo: Hakha IRPD

Salai Cung Cung|2018 July 3| Hakha ah Township Support Development Program (TSDP) min bunh in June 29 zingka ah Mini Marathon tlikzuamnak an tuah i Hung Man le Hanah nih pakhatnak laksawng an co tiah kan theih.

Mini Marathon tlik zuamnak cu June 29 zingka Vomtumaung certual in Hnairlawn lampial tiang Bogyoke lampi hrawn in an tli i Hniarlawn lampial in Vomtumaung certual tiang an rak tli than. Tlik aa zuammi zapi 260 an si. Hi chung ah pa in tlik rang bikmi pakhatnak cu; Dawrthar Siangsangrun then in Pa Hung Man, pahnihnak Pa Ram Uk Lian, pathumnak Pa Bawi Za Lian an si. Nu ah tlik rang bikmi pakhatnak cu No.2 Siangsangrun in Hanah, pahnihnak Nu Cer Chin Sung, pathumnak Nu Van Cer Chin Par an si. Mini Marathon tlik zuamnak ah pakhatnak laksawng ks. 100,000, pahnihnak laksawng ks. 70,000 le pathumnak laksawng ks. 50,000 cio pek an si.

Photo: Hakha IRPD

Tlikzuamnak in zuamnak man laksawng cotu hna cu pa 10 le nu 7 an si. Surlonh chuih zuamnak cu tlamtlingte in an lim cang. Mitat zung nih pakhatnak, Cawbuk nih pahnihnak, Fimthiamnak zung nih pathumnak an ngah. Laksawng cu an pe rih hna lo, pakhatnak laksawng ks. 70,000, pahnihnak ks. 50,000, pathumnak laksawng ks. 30,000 a si tiah kan theih.

“Kum 17 tang pumpululh chuih zuamnak ah aa telmi hi phu 7; Dawrthar, Kehtheibo sang, Cawbuk, Pyidawtha, Dawrhlun, Khuathar le Hakhthar an si. Kumdang ahcun pumpululh chuih zuamnak hi kan tuah bal lo, tukum hi avoi 1nak bik a si. Hiti zuamnak kan tuahhnawhchanmi cu a ralaimi September thla ah ramkulh le ramthen in kum 17 tang pumpululh chuih zuamnak ca i mi thim kan duh hna caah a si. Pumpululh chuih zuamnak pakhatnak laksawng cu ks. 300,000, pahnihnak ks. 200,000 an si lai. Pumpululh chuih zuamnak le surlonh chuih zuamnak laksawng cu lentecelh zuamnak a dih ni ah pek an si te lai” tiah Hakha peng zaanglekcelhnak zung lutlai Pu Jacob nih The Chinland Post ah a chim.

Atu bantuk pumpululh chuih zuamnak, Mini Marathon tlik zuamnak, surlonh chuih zuamnak hi Hakha lawng ah si lo in Chin ramkulh pengkip cio zong nih an rak tuah cio ve tiah kan theih.

Na ruahning rak langhter ve.. (Leave a comment)

%d bloggers like this: