Hakha Ah Zaanglek Cawnnak Phun 6 An Tuah Cuahmah
Salai CungCung|2019 March 11| Hakha ah March 1 in 30 tiang Vumtumaung certual le Khaikam Hall ah zaanglek cawnnak phun 6 an tuah cuahmah tiah theih a si.
“Hi zaanglek cawnnak cu kumfatin tuah mi a si. Thaal chung ngakchia pawl hi Sianginn an khar cang caah vak sawh sawh lo in cawnnak ngeih hna seh ti duhnak in tuah mi a si. Cun hmailei anmah caah ngamdamnak lei siseh zaangleknak lei an thancho khawh deuh nakhnga tuah mi a si. Tu tiang ah cun Taang 9 tang lawng nih an cawn rih i taanghra pawl zong camipuai dih in cawn khawh a si lai” tiah Zaanglek zung tuanvo ngeitu Kyaw Kyaw nih The Chinland Post ah a chim.
“Hi zaanglek cawnnak cu kum fatin tuahmi a si i hmailei zong ah kan pehzulh peng rih ko lai. A duh mi paoh nih zalong tein cawn khawh a si. Cawn man a um lo, a lak in cawn a si” tiah a chim chap.
Hi Zaanglek cawnnak ah cawn ding phun 6 cu; pumpululh chuih, Tennis tuk, Arhmul tuk, Pi-khung-pit, Judo le Aerobic an si tiah kan theih.
Zaanglek cawnnak ah a chimtu cu, pumpululh chuih ah Kyaw Kyaw, Tluang Cung lian, Van Bawi Hu. Judo chimtu ah Tluang Lian. Pi-khung-pit cawnpiak tu ah Kyaw Kyaw. Tennis tuk cawnpiaktu ah Peter. Arhmul tuk cawnpiaktu ah Van Siang Cung. Aerobic cawnpiaku ah Van Cer Cin, Ngun Tha Chin, Par Tha Sung, Ngun Men Tial, Phir Khen Sung an si tiah tuanvo ngeitu sin in kan theih.
About The Author
