Hakha Ah Zatlang Bu Nih ‘Kawl Titoih Puai’ Zeitin An Rak Doh
Editor: 2019 April 14 – Miphun zawnruahnak a ngeimi le ram a dawtu Biaknak rianṭuanmi nih Biakinn le ‘Sunday School’ hrimhrim in Kawl miphun nih an sunhsakmi an biaknak kum relning he a pehtlaihmi a si caah nan i tel hrimhrim lai lo tiah ngakchia cawnpiak a rak si ṭheo tawn.
Hi kong ah a hlei khun in a chimrel bikmi pakhhat cu tleicia Rev. A. Hlawn Ṭial hi a si tiah mi tampi nih an chim. Rev. A Hlawn Ṭial a thih hlan ah a chimrelmi a theihmi poah nih ‘Kawl Titoih Puai’ a phanh ahhin cun an hlam tawnnak zong an chim ṭheo. Amah bantuk ralṭha tein mi a cawnpiak ngammi le a chimrel ngammi kan herh hrinhran dah.
Kum dang tawn bang, kan hnu kum 2018 ah Chin ramkulh cozah nih a nawlngeihnak hmang in cozah rianṭuantu cu anmah cozah hohahnak in tuahmi ‘Kawl Kum Thar Titoih Puai” ah hramhram in lam ter ding a ti ṭhan. Cucu, Zatlang Bu cheukhat nih an theih tik ah an lung a tling lo. Zauk phung in kan i hruai cang. Hramhram in cozah rianṭuantu zong fial ding an si lo timi ruahnak he, Chin nuhrin covo humhakmi phu Chin Human Rights Organization (CHRO) le People Alliance of Credible Election (PACE) nih duhlonak caṭial hram an thawk.
Hi lio ahhin, Chin ramkulh cozah cu cunglei in a hrenmi a si ruang ah a si kho men; “Buddhist Titoih Puai Cu Mitam U Biaknak Puai A Si Caah Cozah Nih Tuan Ding Tuanvo A Ngei” tiah Minister Pau Lun Min Thang nih cun a rak chim.
Cun, “Kawl Kum Thar Titoih lawng ah silo in, Buddhist Biaknak Puai dangdang zong ah cozah zung lutlai pawl hramhram in kal ding Chin ramkulh cozah nih ca an pek hna.“
Cucaah, cozah sin ah duhlonak an langhtermi ‘Ca’ cu Hakha ah hrambunhmi zatlang bu le biaknak hruaitu mino le pumpak a lungthomi minung 20 tluk nih min an rak thut i, 2018 April 2 ah cozah sin ah an rak pek ve nak cu a si.
An caṭialmi ah an langhtermi a tlangpi in phun 4 a si;
“Chin ramkulh cozah nih miphun le biaknak thleidannak ngeilo tein a biapi chiah in upatnak na pek dih hna tiah kan theih. Cu he pehtlai in, Chin ramkulh cozah tlangtlaknak le hrihawhnak in tuahmi ‘Kawl Kum Thar Titoih Puai’ ah anmah lung thawknak tello in nan (cozah) rianṭuantu nan lam termi hna nih an duhlonak le an i nuamlonak an rak chimmi tete kan rak theih” tiah an ṭial.
An peh chap rihmi cu; “Cozah nih International Labour Organization (ILO) Cahren ah hnatlaknak ngeih cangmi le 2008 Phunghram zong ah fiangte in langhtermi ah “a hohmanh hramhram in le anmah pumpak lungthawknak tello in thil tuahter in fiallo ding timi….” kan hmuh khawh. Cuaah, 2018 kum thawk in Chin ramkulh ah tuah dingmi ‘Kawl Kum Thar Titoihnak Puai’ ah cozah riantuantu hna anmah pumpak lungthawknak um lo in hramhram in nan tuahter lo ding ah ramkulh cozah nih nan hun ruah ṭhan ding ah kan in theihter duh hna” tihi a si.
Hi kong he pehtlai in, zatlang bu lawng silo in a cozah chung ah rianṭuan lio mi cheukhat fakpi in a rak aumi le chimrelmi zong an um. Cun, biaknak hruaitu zong fakpi in a rak chimrel mi an um. Cu ruang ah, cozah nih duhlonak fakpi langhter in pumpak cung ah lehrulhnak an tuahmi zong a um tiah theih a si. Thil kan tonmi a tam liangluang kho men. A dangdang a chunglei in siseh, cunglei in siseh, a phunphun le lamkip in kan cawlcang cio ko lai dah! Cun, thil hmete a si rua tiah kan ruahmi hi thil biapi ngai zong an rak si kho ko.
Cucaah, mi tlawmte a simi Chin miphun, kan nunphung, kan biaknak le kan sining a khatlomi Kawl nih an kan dopdawlh cuahmahmi kong ahhin kan zapi in ṭuanvo kan ngei. Cozah rianṭuan, Biaknak rianṭuan le zatlang bu lawng silo in, Pumpak nangmah hrimhrim kha “Ṭuanvo Na Ngei”.
Ṭuanvo kan ngei cio timi lungput he….
About The Author
