Hakha ah Zophei Baptist Church, Hakha An Dirh

Zophei Baptist Church, Hakha September 1 Pumh dih Meeting/ Zophei Baptist Church, Hakha Facebook Page

Zophei Baptist Association le Hakha um Zophei cheukhat tanrual hnatlaknak in Zophei Baptist Church, Hakha (ZBCH) cu September 1, 2019 Keisih Sang, Ramkulh Fimcawnnak zung thlang lamton (electric) lam ah Khrihfabu an dirh cang tiah theih a si.

“Hakha ah Zophei inndong hi 1200 fai le milu in 5000 kan um lai tiah tuak a si. Aluan cia caan tampi ah Zophei Khrihfabu kan dirh lai ti hi ruahnak a chuak lengmang. Pengtlang tanhnak le hmuhthiamlonak a chuak tuk sual lai tiah kan isum lengmang ve. A sinain caan le ni nih a kan hngak ve tilo. Zophei fanau tampi Hakha ah pehtlainak a chambau, cun a ruang tampi ruangah biakinn a phan tilomi tampi um a si. Cucaah Pathian bia in Zophei nih taksa thinlung thlarau kan I funtom than i rian kan tuanti than khawhnak hnga, ramchung ramleng Zophei tefa vawlei lei le biaknak lei ah siseh rian kan tuanti khawhnak hnga le Pathian ram kauhnak caah fak deuh in rian kan tuan chin khawhnak hnga caah a tu bantuk in Khrihfabu kan dirhnak hi a si” tiah ZPBA AGS Rev. Za Ceu nih The Chinland Post ah a chim.

Zophei Baptist Church, Hakha signboard /Facebook Page

Khrihfabu dirhning le pomning kong he pehtlai in “Biaknak Fellowship in zumhning pomning zong aa lawhlo ahcun kan fekfuan lai lo tiah kan ruah caah Baptist lawlaw in kan dirhmi hi a si. Bu le holh kongah thleidannak kan ngei lo. Mah siaremmi holh in Pathian thangthat khawh a si. Khrihfabu chungtel hi mah lungtho te bak in a lutmi lawng kan cohlan rih. Hi Khrihfabu dirhmi kongah Hakha Baptist Association le Hakha khuapi Khrihfabu cheukhat zong thawngtheihternak le mah lungtho tein chungtel si a duhmi hna an um ahcun luh khawh a sinak kong, a herhningin thawng nan kan thanhpiaknak hnga tiah sawmnak le nawlnak kan tuah cang hna” tiah a biapeh ah a chim.

Zophei cu Thantlang peng thlang leikap ah Khua 23 aa funmi khuatlang milu 15000 fai, Thantlang le Hakha ah minung 5500 fai an um lai tiah tuak a si. Zophei Baptist Church, Hakha cu Zophei Baptist Association (ZPBA) BM meeting hnatlak ningin August 25, 2019 ah ZPBA le Hakha Zophei sawmmi cheukhat tonnak ningin biachah a si i September 1, 2019 Zarhpini ah pumhnak an thok hi a si. A voikhat pumhnak le Biakinn onnak ah minung 150 leng an I pum kho tiah thawng kan theih.

“Hakha cu Malaysia bantuk a si lo tikah Hakha an rak phanh cang ahcun mah le aa naihnak Khrihfabu ah ipum kho cio hna sehlaw ti hi kan duhbik ko. Holh zong aa theimi kan si caah mu. Atu cu Hakha a ummi nih thawkmi silo in an khua an ram i Association pawl nih kan dirh lai, kan khua kan ram thanchonak caah an rak ti tikah thlauhnak nawl, tinak nawl kan ngei ve hna lo. Kan dirhmun cu kan chim hna. Cheukhat cu a tong hmanh an kan tong lo. Zophei tu kha an rak chim i HBA nih nan kan bawmh hnga, aherhmi thawngthanh le lungtho tein an itel khawhnak hnga an ti i khakha HBA kan lungput a silo kan ti hna. Kan in thlauhngam hna lo, thlauhnak nawl kan ngeilo. Kan in alngam hna lo tihi HBA kan lungput a si” tiah Hakha Baptist Association General Secretary Rev. Nawl Cung Lian nih The Chinland Post ah a chim.

Hakha khuachungah pengtlang hoih Khrihfabu in Lautu, Mara, Senthang, Zokhua, Zotung le Zophei hna an um i Mie peng zong caan tlawmpal ah dirhding timtuahnak an ngei ve tiah theih a si.

 

Leave a Commnet

%d bloggers like this: