Hakha Ar A Firmi Minung (3) Cu Keisih Sang Mino Bu Nih An Tlaih Hna
The Chinland Post| August 27, 2019| 2019 August 27 zan 12:00pm Dawrthar Market (Keisih sang) ah minung pathum nih ar thahciami zuar dingin chiahmi ar an fir lio ah Keisih Mino Bu nih an tlaih hna i Palek sin an ap hna tiah Keisih Mino Bu sin in kan theih.
Hi kong he pehtlai in Hakha peng palek zung chimmi ningin The Chinland Post August 28 website ah “Hakha ah lunghrinhmi minung pathum palek nih an tlaih hna” tiah kan rak tial.
“Kaa chawhnak in inn lei cycle ka tin lio ah Dawrthar (keisih) market ah thilfir dingin aa chawkmi ka hmuh hna. Ka hawile ka auh hna i kan kalhnawh hna tikah ar pum(4) an firmi he kan tlaih hna. Ar hi zuarding ah thahcia in thutdan tang kuang chungah an chiahmi a si. Sang khuabawi, palek zong thawng kan theihter hna i anmah lei palek nih sakhan an kaipi hna i dantat a herhningin an tawlrel hna hi a si. Kanmah nih kan hmuhmi cu ar (4) lawng asinain Dawr ngeitu Jonathan nu nih (4) a bau, atlau rih ” tiah Keisih Mino Bu president nih The Chinland Post ah a chim.
“Keisih sang ah Cycle tlau, dawrbauh le thilfir hi kan theih lengmang nain pumpak in kan tlai kho bal hna lo. Tutan kan tlaihmi hna he hin aa pehtlai lai ti chim khawh a si lo. Zei ruangah nan fir tiah kan hal hna i zu dinnak kan ngei tilo, cucaah kan fir tiah an kan ti. Firnak upadi in dantat siseh law kum tampi thong atla ding an si caah an lung ithlennak ding le an iralrinnak caah Palek nih a herhningin tuanvo la u kan timi hna a si. Lunghrinh in tlaihmi tiah nan tial tikah mi sawhsawh atlaimi hna kan lawh lai caah Keisih Mino Bu aiawh in fianter ka duh ko” tiah a biapeh ah a chim.
Hi kong he pehtlai in Hakha peng palek bawi U Khin Mg Myint, “Hi minung pathum kan tlaihmi hna cu tu tiang kanmah nih kan chekfel mi chung ah cun zei hmanh an tuahmi a lang rih lo. Hi minung pathum cu zaan tlai hnu ah Hakha khuachung kilvennak duty ciahmi le sang mino hna nih an hmuh hna i an zumh hna lo caah an tlaih hna. Adang pakhat khat thil an tuah sual ah tiin palek zung ah an rak ap hna. Hi minung pathum cu palek nih case kan hunpiak hna i (palek sin ap poh-mah 35 (ယ) in biaceih zung ah taza an cuai hna” tiah nih The Chinland Post ah a chim.
“Hi kan tlaihmi hna cu August 28 tu zing biaceih zung ah kan kuat hna lai. Kannih cu zaan tlai hnu chekfelnak kan tuah lio le sang upa hna nih zaantlai chekfelnak an tuah lio ah tubantuk in lunghrinhmi pawl an tlaihmi hna hi tampi in dantatnak kan pek khawh peng ah cun mizapi zong an him lai i khua le ram zong a him lai. Cucaah mizapi zong kanmah palek he i bawmh cio ding in sawm kan duh hna. Hi minung pathum cu tu tiang ah cun thil an tuah sual mi kan mah lei in cun kan hmu rih hna lo. Biaceih zung nih a chekfel hnu lawng ah a lang dih te lai” tiah Palek bawi U Khin Mg Myint nih a chim chap.
Hi minung pathum an tlaihmi hna cu Hakha peng Hniarlawn khuami Van Cung Hnin (kum 19), Chuncung khuami Hram Zel (kum 35) le Thantlang peng Hriphi khuami Bawi Za Kam (kum 28) an si hna tiah theih a si.
About The Author
