Hakha BEHS No.1 Sianginn Kulhnak Vampang Bawmtu Min Tialmi Hnawtpiak A Tong

November 3, 2020| TCP-Hakha| Hakha BEHS No.1 sianginn kulhnak vampang cu dawtu hna bawmchannak in kulh le a bawmtu hna min langhtermi cu aho ti theihlo minung nih an hnawtpiak hna tiah theih a si.

Hi kong he pehtlai in BEHS No.1 sianginn nupa tawlreltu Chairman Pu Chan Hrem nih “ Hakha ah thiltha kan tuah, fa le hmailei fimcawnnak thancho seh thiltha chuak seh kan ti lio ah hi bantuk thil kan ton hi cu a poi taktak. Hi bantuk lungput ngei Hakha kan um hi a poi taktak. Hi bantuk thil tuah a hmangmi an um kan theih ahcun ichimh hrim cio kan herh” tiah The Chinland Post ah a chim.

Hakha khua chung Siizung lampial lamhelnak mei vanmi siseh, Hakha Vuangtumaung Certual ah NLD ca tarmi zong hi bantuk in hrawh an tong bal ve tiah theih a si.

Hakha No.1 BEHS Vampang cu sianginn a rak kai balmi le dawtu Hakha chung thazang in tuahmi a si I Vampang kulhnak 45 leng a simi ah kulh (8) fai hrawng a hlutu an kawl cuahmah lio a si rih, kulh khat ah Ks.200,000 a si tiah theih a si.