Hakha Calvary Bible College Nih Minung 10 Degree An Pek Hna

Salai Biak| 2018 March 6| Hakha Calvary Bible College (CBC) nih March 4 ah tuahmi avoi 15nak Graduation ah minung 10 degree an pek hna tiah kan theih.

Hi kong he pehtlai in CBC sianguk Rev. Zam Hu nih, “Atu avoi 15nak graduation ah B.Th in minung 8, M.Min in pakhat, Diploma in pakhat an zapi minung 10 degree kan pek hna. Award peknak zong kan ngei i All round award ah B.Th kumhnihnak nu Mang Tum, Behaviour and Spiritual award ah B.Th final year in nu Tling Biak Cin, Academic award ah B.Th final year in Bawi Hlei Thang an si. Tukum siangngakchia zapi hi 53 an si. Tukum tiang CBC in degree a lami hi minung 197 hrawng an si cang” tiah The Chinland Post ah a chim.

“CBC sianginn cu A.G khrihfabu nih a tawlrelmi le a tlangtlakmi a si. Cun APTHC he pehtlaihnak kan ngei fawn. 2018 ah Kawlram General Council nih cohlannak a kan ngeih” tiah Rev. Zam Hu nih a biapeh ah a chimchih.

A ralaimi cacawn kum caah sianginn hun caan hi June 4 in a si lai i sianginn ap caan cu May thla chung ah a si lai. Sianginn kainak he pehtlai in a harsa deuhmi cu zohchunh tlak in ca an thiam si cun bawmhchantu (sponsor) an halpiak hna tiah theih a si.

CBC sianginn cu 1997 kum in rak thawkmi a si. Atu lio CBC sianginn (principal) cu Rev. Zam Hu a si. Sianginn riantuantu faculty  10 an um, caantling riantuantu 7 le caanlak riantuantu 3 an si. CBC ah kai khawhmi Course hna cu B.Th ( Bachelor of Theology), Dip.Th (Diploma of Theology), M.Min (Master of Ministry) le C.Th (Certificate of Theology) an si. C.Th belte hi cu a kai dingmi siangngakchia an um rih lo tiah kan theih. +++

Na ruahning rak langhter ve.. (Leave a comment)

%d bloggers like this: