Hakha Chin Miphun Ni Ah Mai Run Sung Khuangcawi A Si
City Hunter| February 21| February 20, Hakha ah tuahmi Chin Miphun Ni ah Hakhathar in Mai Run Sung khuangcawi a si. Khuang an cawi liomi hmanthlak tampi kan hun in hrawmh chih hna.
Tukum Hakha ah tuah dingmi Chin Miphun Ni ah Mai Run Sung khuangcawi a si lai. Mai Run Sung @Aa Sung hi Hakha Khuahlun a si, 2015 kum Hakha rawhralnak a chuah ruang ah atu cu Hakhathar ah an um cang. Aa Sung hi Hakhathar Pu Ni Khuai le Pi Hoi Vang i an fale pa 5 lakah fanu hniang bik a si. Kalay University, Physics major in 2014 February thla ah B.Sc degree a la. Atu hi Chin ramkulh cozah zung (General Administration Department-GAD) ah cazi (LD) rian a tuan liomi a si.
Aa Sung hi kum 25 a si, 1992 August 14 ah a chuak. Volleyball bengh le hlasak a zuam ngaimi a si. Aa Sung hi pe 5 letmah 2 a sang. Atu a riantuannak GAD lawng ah si lo in an Khrihfabu zong ah an i bochan ngaimi le mino cawlcanghnak kip ah aa teltum khomi a si.
“Chin Miphun Ni a sunlawitertu pakhat cu khuangcawi a si ve. Chin Miphun Ni ah khuangcawi um hlah sehlaw a nuam tuk lem hnga lo. Khuangcawi hi miphun dang sin ah i zahpi awk a si lo, sunhsak chinchin ding a si” tiah Khuangcawimi Mai Run Sung nih The Chinland Post ah achim.
Mai Run Sung nih khuangcawi a si lio ah khuang cung in tampi a hlawrh. Cun, ar zong a hlorh. Khuangcawi cu nunphung pakhat a si. Hlan ahcun bawi phun a simi, cakei a fim khomi, mirum, bawite a bawi khomi tibantuk mirum milian lawng nih khuang an rak i cawi kho. Mirum, mi lian hna nih thang i chuahnak zong ah an hman theu. Sihmanhsehlaw, nihin chanthar ahcun hlan pipu nih an rak i ngeihmi nunphung khuangcawi tlau lonak ding le sunhsaknak caah khua upa, sang upa le cozah lutlai hna nih phun le sinak zoh lo in cawi an si cang tiah kan theih. An ngeih ruang, bawi phun le phunsang an si ruang, cakei an fim khawh ruang ah a si ti lo.
About The Author
