Hakha Chin Miphun Ni Ah President U Win Myint Telh In Khual 650 Renglo An Phan Lai

Salai Cung Cung |2019 January 28| Tukum avoi 71nak Chin Miphun Ni ah President U Win Myint telh in khual minung 650 hrawng an phan lai. Khual zohkhenhnak, thilri cawknak, Lai Paih, Khuangcawi, music, le guest house tibantuk a zapi caah ks. sing 550 hrawng in budget an tuakchunh tiah kan theih.

“Hi a voi 71nak Chin miphun ni caah committee tampi kan um i kan nih hi midawngtu le eidin lei tawlreltu committee kan si. Hi midawngtu le eidin lei committee caah tangka Sing 270 a kan pek. Hi Chin miphun ni ah khual a rak phan ding hi minung 650 hrawng an si lai tiah kan ruah. Chin ramkulh peng 9 chung in peng chung nunphung bu minung 30 an phanlai, cun a dang hi company le a dang dang an si lai. Khual sawmmi hi Kawlram president telh in minister dihlak kan sawm hna, party pawl dihlak, cun ramthen minister dihlak Rakhine, Sagiang tibantuk lei tiang minister zapi kan sawm hna i an rat lai le rat lai lo cu kan hngal kho lo. Hi Chin miphun ni ah hin Chin ramkulh Hluttaw zung zong hunnak an tuah lai caah an mah hluttaw palai pawl zong tampi an rak tlung lai. Amahbelte, Hluttaw palai pawl telh lo in khual hi minung 650 an phan lai ti kan ruah” tiah Chin ramkulh Upadi bawizik Sunny Thang Cung nih The Chinland Post ah a chim.

“Khual pawl umnak ding caah Hakha No. 2, No.3 Sianginn hi kan hman lai. Hi pawl caah a herhmi Ti le Mei um kalnak ekinn tibantuk a dangdang kan tuahpiak hna lai. Khual cu anmah le khuabawi cio nih an rak tawlrel hna lai i Hakha an phak hnu February 18 in 21 tiang kanmah nih kan tawlrelpiak hna lai. Chuan le khin lei ah HBC nubu pawl kan fial hna. Nikhum zong ah anmah nih a kan bawmh i tukum zong hi anmah kan chimh than hna. Hakha hi a kih tuk caah puan zong le a dangdang a herhmi zong cawkpiak chih an si lai. Thilri a herhmi cawknak ah hin Sing 89 hrawng a dih ding a si. Cun Guest House ah hin media pawl an tlung lai i anmah pawl ca hin Sing 24 man tuahpiak chih a si. Mah pawl hi cunglei cozah sin ah kan thanh hna i zeitindah an rak tawlrel ve te lai ti cu a fiang rih lo” tiah a chim chap.

Tukum avoi 71nak Chin miphun ni caah Lai paih caah tangka Sing 30, Khuangcawi caah Sing 30, music lei caah sing 100 hrawng a dih lai. Tukum khuangcawi dingmi cu Senthang an si lai. Cun Hlasatu ding hi kan Lairam chung hlasak thiam pawl an si lai.