Hakha, Chin Miphun Ni Caah Hlasak Thiam David Lai, Tun Kham Le Thawng Za Hnem Sung An Sawm Hna
City Hunter| 2018 January 29| Hakha ah tuahdingmi avoi 70nak Chin Miphun Ni caah Kawlram dirhmun in hlasak thiam minthang a simi David Lai, Tun Kham le Thawng Za Hnem Sung an sawm hna tiah kan theih.
Hi kong he pehtlai in Hakha, Chin Miphun Ni caah laam le hla nuamhsaihnak (Entertainment) lei tuanvo pekmi Pu Tam Aung cu The Chinland Post nih pehtlaihnak kan tuah nain P. Cung Lian Thawng tuanvo ka pek dih tiah a kan ti. Cu ruang ah hlasak thiam P. Cung Lian Thawng cu TCP nih pehtlaihnak kan tuah than i a tanglei bang in in The Chinland Post ah a chim.
“Aralaimi Chin Miphun Ni show caah ringawn tumtu (Band) hi kanmah Laimi band a simi Doron Band (Mang Za Kam te phu) kan chimh hna i an kan cohlan cang. Anmah nih an tum lai. Cun, hlasak thiam hi tampi sawm kan duh ko hna nain Budget an chiahmi a tlawm tuk caah David Lai, Tun Kham le Thawng Za Hnem Sung lawng kan sawm hna. Tun Kham belte hi aa fiang rih lo, a dang pahnih tu cu an i fiang cang. Cun, anmah pathum pin ahhin Laitlang in minthang deuh a simi hlasak thiam minung 6 hrawng in kan sawm chap rih hna lai. Annih tu cu sawmnak ca kan pe in kan thanh rih hna lo. A biapi in Hakha, Thantlang le Falam deuh kan si te kho men. Mah chung in zapi nih uar deuhmi le minthang deuh kha sawm an si ko lai” tiah P. Thawng Bawi nih The Chinland Post ah a chim.
“Budget hi cozah lei in rituk a si caah show ca lawng ahhin ks. sing 200 dih ding lawng in kan tuak. Mah nak tamdeuh in cozah lei nih budget a kan chappiak than khawh sual ahcun Kawlram dirhmun in hlasak thiam minthang dangdang zong kan sawm chap te hna lai. Ringawn tumtu ding Doron band le hlasak thiam sawmmi hna hi February 17 khi Hakha an phan lai. February 18 khi keimah studio ah hlasak ding sakchunhnak (cinhnak) an ngei lai. Show hi February 19 le 20 zan, zanhnih chung bakte a si lai” tiah P. Cung Lian Thawng nih a biapeh ah a chimchap. +++
About The Author
