Hakha Chin Miphun Ni Paih Champion Laksawng Sing 15 Le Taisawm Pek A Si Lai
Salai Cung Cung| 2019 February 14| Kum 71nak Hakha Chin Miphun Ni tuahding mi ah paih laksawng cu tangka Sing 15 le taisawmh pek an si lai tiah tuanvo ngeitu sin in kan theih.
Paih kongkau ah ramkulh cozah nih budget a chiahpiakmi hna pinah a lenglei bawmtu North American Paih Committee le Salai Lungthli Tum nih an hlut hna lai tiah kan theih.
“Tukum Chin Miphun Ni Paih Championship laksawng cu Laimi North American Paih Committee nih tangka 1450,000 a kan bawmh. Cun Salai Lung Thli Tum nih tukum lai paih caah Sing 15 kan bawmh ve hna lai a kan ti. Tukum Piah laksawng cu pakhatnak Sing 15 le taisawm, pahnihnak sing 10, Zatlaang paih sing 5, minung tambik teitu sing 2, paih thiambik le aa dawhbik laksawng Sing 2 le Group zuamnak ah pakhatnak sing 3, pahnihnak sing 2, Minung pakhat tei ah upa he ngakchia he 2000 pek an si lai” tiah Rev. Khar Ling nih The Chinland Post a chim.
“Kan lai paih hi ning cang tein le suallam ngei tein tuah kho u sih ti ka duh. Kan lai paih hi mizapi nih zoh sawh lawng si lo in zeitin kan thanchoter lai ti i bawmh cio kan herh. Hmailei ah cun Champion laksawng zong tamdeuh piin i tuah kho seh law pawcawmnak tiang si kho ding in tuah kho u sih ti hi ka saduhtah a si. Paih Committee hi tangka kan herh tuk rih caah a duh mi paoh nih bawmh khawh kan si. Kan lai paih a thancho chin lengmang nakhnga ramchung ramleng mipi thazaang chuah cio ding in kan i sawm hna” tiah a chimchap.
Tukum cu paih committee nih paih tikah hohmanh zuri lo in tlangtlatu zong zuri lo tein le felfai tein um ding in biachahnak an ngei. Tukum Chin Miphun Ni Paih cu 19 zing suimilam 11 in zaan suimilam 9 tiang nihnih chung tuah a si lai. Paih zulhphung tuahmi cu Zatlang paih le club paih ah minute 7 in a si lai i minute 7 chung i tei lo ah cun minute pa 3 chap i cu chapmi chungin an i tei lo ah cun tangkop in si lai. Zuamcawh paih minute pa 10 a si lai i an i tei lo ah cun minute pa 3 chap i tei lo ah cun tangkop a si than lai tiah kan theih.
Paih Committee hna cu; Pu Chum Ling(Chairman) Committee ah Saya Jacob (Hakha zanglek zung lutlai), Pu Phir Mawng (Chuncung), Pu Khin Mawng Win (Pyidawta), Pu Van Hu (Dawrhlun). Paih referee (Dailuci) Pu Ca Kio (Dawrhlun), Pu Bual Kung (Hakhathar), Pu Ral Ceu Nawl (Hakhathar), Pu Chan Zam (Khuathar), Pu Tluang Zel (Khuathar), Pu Hlei Cung (Khuathar), Pu Ni Maung (Hniarlawn) le Pu Soe Myint (Chuncung) an si tiah kan theih.
About The Author
