Hakha City Bus Citman In Nikhat Ah A Tambik Ks. 90,000 Lawng An Hmu

0

Salai Cung Cung |2018 August 9| Hakha khua a rawh hnu in hmunthar ummi hna caah umkal har tuk lai tiah CBCUSA bawmhnak in 2016 December 1 ah HBA nih tawlrel in Hakha City Bus an tuah. Nikhat ah motor citman in a tambik ks. 90,000 lawng an hmuh caah an sungh peng tiah kan theih.

“Hi Hakha City Bus cu a luancia Hakha a rawh hnu in CBCUSA ummi nih 2016 ah khan a kan cawkpiak i tu hi mah City Bus cu kanmah HBA nih pekzulh tein tuanvo kan lak i kan kal pi. Motor hi pahnih si i a a mongtu pakhat le a zultu tiin kan chiah hna. Nikhat voi 5 kan kal tawn. Hi City Bus kan tuahmi in tangka amiak cu kan hmu bak lo, kan sung peng. A ruang cu motor a rawh caan le Datsi man he tuak ah cun tangka kan hmu bak lo. Nikhat ah voi 5 kan kal tluk in hin tangka tampi hmu ding kan si ko nain kan hmuh tambik caan hi nikhat ah ks. 90,000 hi kan hmuh khawh. Motor mong le a dangdang aherh mi tuak ah cun mualpho ding khi asi ko nain kannih cu khrifabu lei in tuahmi asi tikah hi City Bus kan tuahmi cu kan peh zulh peng ko lai, zarkhat chungah zarhpi ni te lawng kan i din” tiah HBA Youth Department Secretary Pastor Van Tling Thang nih The Chinland Post ah chim.

Hi Hakha City Bus cu mi zei paoh caah asi i nikhat ah voi 5 a kal tawn. Motor cit man ah hin minung pakhat ah ks. 500 asi nain siangngakchia cu 200 in a si. Hi City Bus cu hlan khawh zong asi, voikhat hlan ah 30,000 asi. Motor a chuah caan cu; zingka suimilam 7:00 ah voikhat, suimilam 8:00 ah voikhat, suimilam 12:00 ah voikhat, suimilam 3:00 ah voikhat le suimilam 4:00 ah voikhat tiin an chuak. Nikhat ah ks. 30,000 asilole ks. 40,000 tibantuk lawng an hmuh caan a tampi tiah kan theih. +++

About The Author

Na ruahning rak langhter ve.. (Leave a comment)

%d bloggers like this: