Hakha Club Paih Ah Hakha Khuathar Nih Pakhatnak An Co
TCP-Hakha| 2019 February 20| February 20 chun hnu, Hakha ah tuahmi Chin Miphun Ni club paih ah Hakha Khuathar nih pakhatnak an co tiah kan theih.
Club ah aa paimi zapi hi phu 8 an si. Final ah Hniarlawn le Hakha Khuathar club an i pai i Hakha Khuathar nih an tei hna. Club aa paimi phu 8 cu; Hakha Khuathar, Hakha Khuathar Foundation-A, Hakha Khuathar Foundation-B, Hniarlawn, Zokhua, Chuncung, Zophei, Dauchim, Senthang le Hakha Farrawn an si.
Hakha Khuathar club nih pakhatnak laksawng ks. sing 3 (300,000) le Hniarlawn nih pahnihnak laksawng ks. sing 2 (200,000) laksawng pek an si lai.
“Tukum Chin Miphun Ni Paih Championship laksawng cu Laimi North American Paih Committee nih tangka 1450,000 a kan bawmh. Cun Salai Lung Thli Tum nih tukum lai paih caah Sing 15 kan bawmh ve hna lai a kan ti. Tukum Piah laksawng cu pakhatnak Sing 15 le taisawm, pahnihnak sing 10, Zatlaang paih sing 5, minung tambik teitu sing 2, paih thiambik le aa dawhbik laksawng Sing 2 le Group zuamnak ah pakhatnak sing 3, pahnihnak sing 2, Minung pakhat tei ah upa he ngakchia he 2000 pek an si lai” tiah Rev. Khar Ling nih The Chinland Post a chim.
February 19 chun in tuahmi zatlang paih ah aa paimi zapi hi minung 120 leng an si. Denmark in a rak tlungmi Chuncung pathawng Lian Za Pum a donghnak lei ah a chuak i minung pahnih a tei hna hnu ah Hakha Khuathar in Tluang Zel nih a chuahhnawh i a tei. Tluang Zel cu US in a rak tlungmi Hakha Khuahlun Bawi Hnin nih a chuahhnawh. Bawi Hnin nih Tluang Zel cu a tei i bual an coter. Zatlang paih bualco laksawng cu ks. sing 5 (500,000) a si.
Hika ah club le zuamcawh an i paihnak video zoh khawh a si.
Atu hi zuamcawh an i paih cuahmah liopi a si. Pathawng an tling pah dih tiah kan theih.
