Hakha Cozah Mucu Thlang Ah Inn Pakhat Cu A Cim Caah Mi An Um Ngam Ti Lo

Salai Cung Cung |2018 September 12| Hakha Cozah Mucu thlang inn pakhat cu September 9 hrawng ruah fak tuk in asur mi nih khan tivahur aluang mi nih inn lei vawlei alak dih caah a cim dih i inn tang vawlei tiang zong akat dih caah inn hlan tu an um ti lo tiah kan thieh.

“Kan hnu zarh September 9 hrawng i ruah fak tuk in a sur mi nih khan kan inn vawilei cu a lak le a cim, Inn tang lei vawlei a kat dih cang, minung um ngam ding a si ti lo. Chin ramkulh cozah Sipin bawi nih an rak zoh ko nain tu taing ah cun zeihmanh a kan tuah piak rih lo. Sipin bawi pa nih , Hakha ah chungkhat sahlawh rual chan nan ngei ma? nan ngeih lo ahcun cozah inn sak mi Hakha khuathar sang lei zong ah nan duh ah um kho si a kan ti ko nain, kan fale an sianginn kainak a hlat tuk lai caah tu hi kan inn pawngah ni 5 hrawng kan um cang” tiah inn hlan tu nu nih The Chinland Post ah a chim.

“Hi inn cimhnak hmun tiva hur cu kan hnu lei ah keimah le Chin ramkulh minister le Hluttaw Chairman tiin kan va zoh. IBC biakinn thlang aluang mi tiva hur caah kan hnu lei ah estimate kan tuah nain Sing 9000 hrawng dih ding a si caah tu lio 2018-2019 Budget nih a tlinh ti lo caah 2019-20 lei tu ah kan tuah khawh te lai” tiah Sipin Minister U Soe Htet nih The Chinland Post ah a chim.

Hi inn a cimhnak hmun cu Hakha Cozah mucu le IBC biakinn thlang lei a luang mi tivahur a si. Mizapi nih zulh mi lampi zong a si, abik in siangngakchia lam kalnak ah a um mi asi caah tuan deuh tein cozah nih kan remh piak hna seh a tha lai tiah upa pakhat nih a chim. ++++

Leave a Commnet

%d bloggers like this: