Hakha education College Ah Siangniamruun Cachimh Rian Ca Training Sok Khawh A Si
Salai Ngun San Aung| 2018 January 19| Hakha Education College ah siangniamruun cachimh rian tuan a duhmi caah kumkhat chung training kai ding sok khawh a si.
Chin ramkulh chung ah siangniamruun cachimtu luh a duhmi hna caah Hakha Education College ah semester pahnih chung training kai ding sok khawh a si cang i luhnak camipuai phit ding nicaan pawl zong an tar cang.
Camipuai phi ding, soknak catlap lak caan cu January 2 in February 2 kar a si. Phit caan cu February 3, niruk ni ah a si lai i zing sml. 9:00-11:00 tiang sml pahnih chung a si lai. Phit dingmi cu Mirang ca le a dangdang hngalhkauhnak a si lai tiah theih a si.
“Hi cawnnak ah nu 50 le pa 50 cohlan an si lai i thlaruk chung cawnnak an kai lai, an dih bak in rian pek colh an si ko lai. Cun hi kan tuah hnawhchan cu Laitlang ah siangcachim thazaang kan chap khawh nak ding caah a si” tiah Chin ramkulh Hluttaw chairman Pu Zo Bawi nih a chim.
Camipuai a phi ding mi nih, phit ding an khiah mi ni zinglei sml 8:00 ah min pek a si lai. Hmatpungtin, အထက ေအာင္လက္မွတ္မူရင္း, le Buaih lethmat i ken a herh lai. Hi ken ding timi pawl aa ken lomi cu camipuai phitnak nawl pek a si lai lo.
Hi cawnnak kai dingah camipuai a awng mi hna cu tu i Hakha Education College ah a kai liomi hna intern-ship an kal kar ah kai a si lai i an intern-ship caan a dih in tu cawnnak i a kai mi kha intern-ship ah an kal ve lai. Cuticun semester pahnih chung an kai hnu ah rian pek an si te lai tiah kan theih.+++
About The Author
