Hakha Grace Baptist Church Nih Avoi 2nak Bible An Leh
Salai Cung Cung |2018 August 24| Hakha Grace Baptist Church nih Bible biakam hlun an leh liopi a si tiah thawng kan theih. Hi an leh hlan ah hin Biakam thar cu an rak leh cang i a chuak zong a chuak cang.
“Kawlram ah hin Bible International Myanmar Society (BIMS) nih hin Bible hi holh phun thum in leh a si. Cu chung ah cun kanmah nih Hakha (Lai) holh in minung pali nih kan lehmi a si. Mah a letmi chung ah hin Rev. Hoi Cung Tum, Rev. Jacob Biak Lian, Pastor Ronal Cung le Rev.Pual Ram Cung ti bantuk in an si. Biakam thar cu leh dih a si cang i chuah zong a chuak cang. Biakam thar hi kum 7 an rau, Biakam thar leh lio hin cun keimah le Rev. Hoi Cung Tum lawng kan si. Cun RRC timi (read and review committee) chung ah hin minung 20 hlei kan si. Biatak tein a kan rel piaktu hna cu sayagi Lian Uk le Pu Thla Hmung an si. Tu Biakam hlun kan leh lio ah a kan relpiak lio hna cu Pu Ram Mang, Pu Thla Hmung nih biatak tein a kan bawmh. Hi biakam hlun cu 2017 in kan thawk i kum 10 hlan ah kan lim kho te hnga maw,” tiah Rev.Pual Ram Cung nh The Chinland Post ah chim.
“Hi Bible lehmi kong he pehtlaih in Laimi tampi nih a kan ruah sual lengmang. Lai Bible ca pakhat kan ngei cang ko, a za cang ko tiah an ti. Mirang zong nih Bible hi version tampi an ngei ve ko. Zeibantuk Bible cauk poah hi zakhat chung ah zakhat ning in a tling dih lai tiah zumh khawh dih a si lo. Cucaah, kanmah zong nih kan duhmi cu Laimi nih Bible version hi tampi ngei kho hna usih ti hi a si. NIV, KJV si zongah 100 ah 100 hi palh lo tein an leh mi a si lai ti cu chim khawh a si lo. Kanmah nih kan zumh ning ah cun mah hna hi 99% hrawng hi a hman hrim ko lai timi zumhnak he kan lehmi cu a si. Mi nih an lehmi zong a tling dih cu a si lai lo. Cu ve bantuk in kanmah lehmi zong a hman dih lai cu a si lo. Cucaah hi atling dih cio lo mi kha a cawngmi pawl nih tha tein tuaktan le ruat in a tha in an hmang kho ding kha a si.
Hi bible kan lehmi hi pakhat le pakhat i elnak le i zuamcawlhnak si loin Laimi nih version tampi kan ngeih khawh nakhnga timi ruahchannak he kan tuahmi a si,” tiah a chim.
Hi bible leh mi cu KJV hi kha i zohchun mi a sinain biafang har deuh mi le fiang deuh lo mi cu Hebrew ah zoh than le fiangh than a si caah hi Lai Bible leh mi cu KJV nak hmanh in a fiang deuh mi Lai Bible a si kho men. Kanmah nih kan lehmi Version a min cu Hakha bible thiang kan ti i mipi cheukhat nih Hakha Bible thiang tiin min pek cu tiah a chim mi an tam pah caah biakamthar he biakamhlun tlamtling tein adih tik tuin a min zong kan thleng kho men,” tiah a chim chap.+++
About The Author
