Hakha Innhmun 712 Samh Dingmi Ah Innhmun 22 Cu Ks. Sing 50 In An Zuar Lai
The Chinland Post| 2019 August 20| Hakha ah ekah 676 innhmun thar samh an timhmi cu a zapi innhmun 712 a chuak lai. Hi chung in innhmun hmun tha bik timi innhmun 22 cu ks. sing 50 in an zuar lai tiah kan theih.
Hi kong he pehtlai in Chin ramkulh cozah bu in chimnak nawlngeitu Minister U Soe Htet nih atu bantuk in a chim.
“Atu Hakha ah innhmun thar kan samh dingmi ekah 676 chung hin innhmun 712 a chuak lai. Innhmun hi thenli ah an then. Pe 100 velchum (pe 100×100) hi innhmun 22 a um lai i ks. sing 50 (5,000,000), pe 80 velchum (pe 80×80) hi innhmun 75 a um lai i ks. sing 35 (3,500,000), pe 60×80 hi innhmun 445 a um lai i ks. sing 25( 2,500,000), pe 40×60 hi innhmun 175 a um lai i ks. sing 10 (1,000,000) a si lai. Innhmun a sok i a ngahtu paoh nih a cunglei ret khiahmi ning in rikhiahmi nicaan chung ah an liam colh a hau te lai” tiah a chim.
“Hiti innhmun a man in kan zuarnak a ruang cu ti, lam, mei tibantuk thate le dawhcah te in kan tuan khawhnak ding caah a si. Innhmun samhnak caah budget tamtuk dih ding a si caah cozah budget lawng nih a zat ding asi lo caah atu bantuk in a man in innhmun kan zuarnak hi a si. Atu innhmun samh kan timhnak hmun lam kan cawhnak le aherhmi tete kan tuahnak hmanh ahhin tamtuk kan dih cang, leiba tamtuk kan ngei cang. Company pawl nih a ba in an kan tuanpiak chung. Atu ah a taangmi rihmi inn karlak lam, luti luannak, mei tibantuk tuahnak zong ahhin tampi a dih lai. Cu bantuk a herhhaimi caah innhmun man kan hmuhmi chawva hi hman dih an si lai” tiah a biapeh ah a chimchih.
Innhmun sok caan hi August 12, 2019 in tu thla August thla dongh tiang sok le form ap khawh rih a si. Innhmun a soktu hi minung 2000 leng an si cang. Zeitik ahdah innhmun thenphawt le phawtzamh a si te lai cu a fiang rih lo.
Inn hmun soktu hna nih innhmun an ngah an i fian cangka ninga chung ah a cunglei innhmun a bitkauh le a ret khiahmi ning in inn hmun man an pek colh lai. Ninga chung i a pek khawh lo ahcun a innhmun chuh than a si lai. Cun, innhmun a ngahtu hna nih kum 5 chung tiang an zuar lai lo, an zuar ahcun an sakmi inn le vawlei hmun chuh than an si lai. Innhmun a ngahtu hna nih thlaruk chung ah nan sak lai timi innhmun soknak catlap ah an langhter chih.
Hi innhmun cu Hakha ah kum 10 in a cunglei khua a sa cangmi le innchungkhar pakhat ah minung pakhat lawng nih sok khawh a si.
Atu innhmun samh an timhnak hmun cu Cawbuk sang, CCU (Chin Chistian University) thlang le Nawi kiangkap hrawnghran ah a si.
About The Author
