Hakha Innkangh Ruang Ah Minung Pathum An Thi; Thaizing Ah An Ruak Vui An Si Te Lai
City Hunter| 2018 May 31| May 31 zan, deilei suimilam 2:00 hrawng i Hakha khuapi inn a kangmi meitet lakah a tlaumi minung pathum an ruak in an char hna. An ruak cu June 1, thaizing ah vui an si te lai tiah kan theih.
Hi kong he pehtlai in Pu Ral Kham nih, “Zingka suimilam 6:30 tluk ahkhan innkang meitet lakah A Han Nu (Pi Hliu Ngua) le Van Bawi Zi ruak an hmuh i an char hna hnu ah Pi Vui Cer (Ni Ceu nu) ruak zong suimilam 7:00 tluk ah innkanghnak hmun ah an hmuh i an char ve. A Han Nu ruak cu sii-inn ah chekhlatnak an tuah i suimilam 7:15 tluk ah khan a ruak cu inn ah an tinpi cang. Atu hi Van Bawi Zi ruak le Ni Cer nu ruak sii-inn ah an chek lio hna a si. A rauh hlan ah an chuahpi hna lai i inn ah tinpi in an ruak suan an si te lai. Ruak hi thaizing_ June 1 ah vui an si te lai” tiah The Chinland Post ah a chim.
May 31 zan, zinglei suimilam 2:00 hrawng, Hakha lamtonnak (laansone), Dawrthar sang ah inn pahnih le dawr pali a kaang i an ciam dih. Inn a kaanghnak hi Hakha Dawrthar sang, lamtonnak hmun, Bogyoke lampi cung ah a si. Inn a kaangmi cu Wai Han Nu te inn (Pale Store), Pu Siang Kung (Pi Vui Cer) inn le dawrkhaan te lawng sakmi inn an si. Inn a kaangmi chung ahhin dawrkhan pali aa tel. Van Siang Mang pa inn le Wai Han nu te inn cu a ciam dih ti tluk a si. Pu Ni Cung inn (Lairam Canphio Dawr) zong vampang vialte mei nih a hrem, a kangh ve nain khuami le meithat motor nih an hmih manh than. Pu Sang Cung inn zong a hrem pah nain meithat motor nih an ven i an phelh manh than.
Pale store dawr ngeitu Sui Sui hi mei a kangh cuahmah lio ah sii-inn ah an kalpi. A thimi pathum pin ah midang aa hliammi hngalh an si lo tiah kan theih.
Mei hi khuazei in dah a kangh le zeitindah a kangh ning a si timi fiangte in hngalh khawh rih a si lo. Khuami le sang upa chimning ahcun Pu Siang Kung inn in mei kangh hi i thawk sehlaw a dawh tiah an chim.
Dawrthar sang nu upa pakhat nih, “Mei hi Pi Vui Cer nu te inn coka in aa thawk. An coka in a kangh ka hmuh. Zeitindah a kangh ning a si ti belte cu ka hngal lo” tiah mei a kanghnak hmun zapi sin ah a chim.
Mei a kaangmi cu khua a dei hnu ceu lawng ah an hmih khawh. Mei hi a kangh ka in meithat motor an ra ko nain a kanghning a fah tuk caah an hmit kho zokzok lo. Meithat motor a rami hi 8 hrawng an si. Hakha penguk zung lutlai siseh, Chin ramkulh hluttaw zung upa, Chin ramkulh minister le Chin cozah upa hna zong mei kanghnak hmun ah an rak chuak colh ve.
Tukum chung lawng ah Hakha khuapi chung ah innkangh voithum renglo a chuak cang i atu hi avoi 4nak hrawng a si cang tiah kan theih.
About The Author
Wai Han Nu te inn (Pale Store) na tinak zawn hi “A Han nu” te inn ti a si deuh lai !