Hakha Khrihfabu Kip Pumpululh Chuih Ah Semi Final A Chuih Ding Phuli
City Hunter | 2018 June 5| May 22 in thawkmi Hakha Khrihfabu kip (town churches) pumpululh chuih zuamnak cu June 5 ah Calvary le Gospel an chuih i Calvary nih 4-2 in an tei hna. A puai hnihnak ah Senthang Baptist Church (SBC) le Believer (BCM) an chuih i SBC nih 2-1 in an tei hna. Semi final a kaimi phuli cu June 7 le June 8 ah an chuih than te lai tiah kan theih.
Hakha Khrihfabu kip pumpululh chuih zuamnak ah semi final a kaimi phuli cu; Free Methodist Church, Chuncung, Calvary le Senthang Baptist Church (SBC) an si. June 6 cu an i din rih lai.
“ Semi final cu June 7 (nili ni) ah Free Methodist Church le Chuncung an chuih lai i June 8 (Ninga ni) ah Calvary le Senthang Baptist Church an chuih lai. June 9 le 10 (zarhte ni le zarhpi ni) an i din than lai i final cu June 11 (nikhat ni) ah an chuih te lai” tiah Hakha peng zaanglekcelhnak zung in lutlai Pu Jacob nih The Chinland Post ah a chim.
Tutan pumpululh chuih ah aa tel khomi zapi phu 15 an si. Hakha Town Churches Pumpululh zuamnak cu Chin ramkulh zaanglekcelhnak zung nih bawmhnak pek asi i khrifabu a chuakmi paoh singkhat (ks. 100,000) cio bawmhnak pek a si. Hi pumpululh chuih zuamnak cu Chin ramkulh zaanglekcelhnak zung nih ks. sing 40 hrawng dih in tuah an timh i pakhatnak laksawng ah ks. sing 5, pahnihnak laksawng ah ks. sing 3 a si lai i pathumnak tu cu laksawng pek a um lai lo tiah kan theih.
Avoi 1nak Town Churches pumpuluh chuih zuamnak cu Free Methodist nih pakhatnak le Zion nih pahnih an rak ngah. Avio 1nak Town Churches pumpululh chuih zuamnak ah phu 21 an rak chuih kho. Avoi 1nak cu Chin ramkulh minister hlun Salai Isaac Khen bawmhnak in rak tuah a si.
