Hakha Khua Ah Eidin Man A Kai Tuk, Thilri le Nifatin Eidin Cheukhat Zong A Dih Thluahmah
The Chinland Post | 2023 April 20 — Chin ramkulh, Hakha khua ah mawṭaw lutchuak a um khawh ti lo caah eidin man a kai tuk i thilri cheukhat zong a dih tiah theih a si.
Hakha khua i facang, chiti, cite tiah nifatin eidin hna cu Kalaymyo lei in a tam bik a lut mi a si. April 7 thawk in SAC ralkap pawl thazang tampi in Chin ramkulh chung an rak lut i Kalay-Falam-Hakha lam cu atutiang hman khawh a si lo caah thilri le eidin a phan kho ti lo tiah theih a si.
Cun Gangaw-Hakha lam zong ah kahdohnak a chuah caah lam a pit i eidin phor mawṭaw an lutchuak kho ti lo.
March thla dongh le April thla hramthawk hrawng ah Kanan Ayeyarmin Kawchiat tunkhat ah 80,000MMK in cawk a si nain atu ahcun facang thar tunkhat ah sing khat leng, facang hlun tunkhat ah 130,000MMK, Pawsan Hmuai tunkhat ah 140,000MMK in cawk a si cang.
Sihmanhsehlaw April 19 ahcun facang cawk awk hmanh hi a um ti lo tiah theih a si.
Cubantuk in arsa le ngasa hna zong cawk awk a um ti lo tiah theih a si.
Cu leng ah Kawpi hlum, Anṭam, anthawr, aalu, le adang dang nifatin eidin hna zong a man kai tuk i cawk awk hmanh a har ngai cang tiah theih a si.
Nifatin eidin a dih thluahmah lawng siloin datsi/diesel man zong a kai tuk cang i datsi gallon khat ah 17,000-20,000 tiang a phan i cawbuk sang lei datsi dawrthluan ahcun datsi cawk awk zong a um ti lo tiah theih a si.
Atu bantuk in mipi eidin a harnak hi hramhram uknak ruang ah a chuak mi a si bantuk in dothlennak caan chung ah Hakha khuachung ah ngunkhuai hal, ngunkhuai pek le thilman kaih tuk lo ding tiah Hakha Circle Council nih cathanh an chuah i a zul lo mi cu dantat nan si lai tiah April 19 ah an thanh.
About The Author
