Hakha Khua Ah Mino Pakhat An Tlaih I Sing 30 In An Tlanh Ter Hna
The Chinland Post | 2023 August 28 — Chin ramkulh, Hakha Khua, Leisen Sang, Agape Biakinn lei kainak lam le Cawbuk lei kalnak lamton ah palek nih mino pakhat an tlaih tiah thawng theih a si.
August 28 zinglei sml 9:30am hrawng ah Hakha khua, Leisen sang, Agape biakinn lei kainak lam le cawbuk lei kalnak lamton ah SAC kuttang palek pawl nih mino pakhat cu an tlaih i mawṭaw cung ah an kalpi tiah thil sining a hmu mi Hakha khuami pakhat nih The Chinland Post ah a chim.
“Zinglei sml 9:30am hrawng ah Hakha hrambunh SAC kuttang palek pawl nih Auto zung hmai ah hmunhma an la. Voidang hmunhma an lak ahcun cycle umkal mi pawl an check tawn hna nain tuni cu an check hna lo. Cun tlawmpal ah mino pakhat an tlaih i mawṭaw cung ah an khinh i an kaipi kha ka hmuh”.
Amah hi kawl miphun a si, palek pawl zong kha thawngpang an theih ruang ah mi a rak bawh mi an lo ngai tiah a chim fawn.
Adang Hakha khuami pakhat zong nih “Auto zung pawng, Auto sang lei in Leisen sang lei ah cycle in a rak kai lio mi mino pakhat an tlaih i mawṭaw cung ah an kaipi. Amah hi muka angki a sen mi aa hruk. Mizei a si cu a fiang in kan thei lo” tiah The Chinland Post ah a chim ve.
Cu an tlaih mi pa cu a zaanlei ah tangka sing 30 in an rak tlanhter hna i an va tlanh cang ti zong kan theih nain The Chinland Post nih adang lam in kan fehter khawh mi a um rih lo.
Hmanthlak – Auto zung hmai (Hmanthlak Hlun)
