Hakha khua hmun 2 ah kah dohnak a chuak, SAC chungtel a thi mi an um
The Chinland Post | 2022 September 27 – Chin ramkulh, Hakha khualipi, September 27 ah SAC ralkap le CDF karlak ah kahdohnak hmun 2 ah a chuak i SAC palek a thi mi le hliam a tuar mi zong an um tiah theih a si.
September 27 zinglei sml 7:00am hrawng ah Chin ramkulh, Hakha khualipi in Falam lei chuahnak, lam ruk tonnak ah SAC ralkap le CDF karlah ah kahdohnak a chuak i SAC palek 1 a thi, 2 an i hliam i SAC bom ruangah mipi inn pakhat zong a rawk tiah theih a si.
“Zinglei sml 7:00am hrawng in kahdohnak thawng kan theih i sml 8:00am hrawng ah a dai, kahdohnak chungah palek pakhat a thi i Hakha sizung ah an kalpi mi hna palek 2 zong an um tiah kan theih” tiah Hakha khuami pakhat nih The Chinland Post ah a chim.
Cu bantuk ṭhiamṭhiam in September 27 zaanlei sml 1:30pm hrawng ah Chin ramkulh, Hakha khua, Cawbuk sang ah a um mi Saint John sianginn pawnghrawng ah kahdohnak a chuak ṭhan.
Hakha khuami pakhat nih Cawbuk kahdohnak kong he pehtlai in a hmuhmi kha hitihin The Chinland Post ah a chim.
“Lam pawng ah an i kah tikah, SAC ralkap pawl an tlik le an zaam lio siseh, an au thawng le an cawlcangh lio kha a langhlat in kan hmuh khawh hna, kahdohnak a daih hnu ah mawṭaw 7 in duhsah tein an kir ṭhan”.
Cawbuk sang kahdohnak chung zong ah SAC palek 2 an i hliam tiah khuami hna nih an chim.
About The Author
