Hakha khua pawngkam ah kahdohnak a chuak, Hakha palik sakhaan lei in meithal thawng a thang

0

The Chinland Post | 2022 August 2 – Chin ramkulh, Hakha in Thantlang lei kalnak timit tiva kam hrawng le lungkhar tlang lei ah Chin hriamtlai phufonh le SAC ralkap karlak ah July 30 in kahdohnak a thok i nifatin in kahdohnak a peh.

SAC ralkap pawl cu hmun 3 ah i ṭhen in July 30 thok in Timit hlei remh ding le a pawngkam hmunhma tlaih duh ah ke in thazang an samh.

SAC ralkap phukhat cu Nawi tiva an kai i Timit le Congthia karlak Lungkhar tlang an phanh lai ah Chin hriamtlai phufonh nih August 1 zaanlei sml 2:30pm in zaan sml 8:00pm tiang an kah hna i SAC ralkap pakhat a thi, hliamhma a tuarmi an um tiah CDF-Zophei nih a thanh.

Cun August 2 zaanlei sml 3:30pm hrawngah Hakha khua, Dawrhlun sang ah a ummi palik sakhaan lei in meithal le bom thawng pehzulh in a thang.

“Kahdoh thawng hi Hakha khua ning piin theih khawh a si. Palik sakhaan lei a lo ko. A rau tuk lo. Chikhat kar ah a dai ṭhan. Kahdoh thawng a than cuahmah lioah No.1 B.E.H.S ah sianginn a kaimi hngakchia pawl zong an ṭin cuahmah ko” tiah khuami pakhat nih The Chinland Post ah a chim.

Kaphnih karlak kahdohnak a chuahmi maw a si asiloah SAC ralkap nih an puah sawhsawh mi dah a si ti cu a fiang in theih a si lo.

Tutan Hakha pawngkam kahdohnak hi CDF-Zophei, CDF-Hakha, CDF-Thantlang le CNA hna bawm in kahdohnak an tuah hi a si.

Cu lengah, SAC ralkap pawl zong hnu kir loin thazang chap le hmunhma an lak rih ko caah kahdohnak aa peh rih khomi a si. Cucaah mipi hna nih Hakha-Timit kar le Timit-Congthia karlak umkal rih lo ding in CDF-Zophei nih ralrinnak a thanh.

About The Author

Na ruahning rak langhter ve.. (Leave a comment)

%d bloggers like this: