Hakha Khuachung Lam (134) Cu Sipin Nih Lam Min An Pek Dih Cang
Salai Ngun San Aung| 2018 February 23| Chin ramkulh khuahlipi Hakha khuachung lam (134) cu Hakha City Master Planning he ruahnak i bawm in Chin ramkulh sipin zung nih lam min an pek dih cang.
Hi kong ah Pu Thla Hre nih “khuapi pakua ah sipin cio kha tuanvo pek in khuanu khuapa le mino bu, biaknak lei upa tibantuk in ton pumhnak ngeih i anmah pengtlang chung in Laimi huap min ngei kan nu le pa min cazin chuah pi cio ding ti a si. Cun thingram, pangpar min tibantuk ah khan Kawl ca kawl min telh bak lo ding kan ti. Amah bel, Aung San Suh Kyi, U Thein Sein tibantuk minung min kha cu a um ve ko. A tlamtling dih hrim hrim lai lo. Asinain upa mi tam pi nih a tha bik in an ruah ning in kan kalpi i cu ruang ah 2014 hrawng in ceih cang mi a tu lawng kan tuah khawh nak zong hi a si. Hi cathar khenhnak ahhin tender kan auh nain hohmanh nih an sok lo caah upa nih khua an khan i nanmah sipin nih tuan ko uh an ti caah zung in kan tuan. Hi catar khenhnak ahhin tangka sing 325 a dih. Lam min hi 134 lawng asi ko nain cheukhat cu lam te pahnih thum a um caah tung hi 172 kan bunh” tiah Hakha City Master Planinig Committee haotu, Sipin Director Pu Thla Hre nih a chim.
Lam min an pek ning hi phun nga in an then. (1) Peng kip in chuah pi mi upa min ngei hna min, (2) Khuapi min, (3) Pangpar min, (4) Chin miphun a si lomi chung minung min, (5) Peng kip in chuah pi mi leng in upa nih betchap mi minung min tiin an si. Khuapi min ah hin Thantlang lam timi pakhat te lawng aa tel. Matupi lam hna kha min bunh ding ti a si ko nain Zipeng Za Hoe (Pu Za Hoe) kha tu hlan ah lam min ah rak hman a si nain lam hme tuk ah a si, annih cu kan pa tak tak a si tiah ruah a si caah upa tuanvo ngei hnatlaknak in Matupi lam rak ti tawn mi kha Za Hoe lam tiin an thlen. Kan pa le min ahhin Thantlang in minung pali le Hakha in minung (19) an si. Hi chung ah a nung rihmi Thantlang in Vice President Pu Henry Van Thio, Hakha in Pu Zo Tum Hmung le MP Lian Uk an i tel. Ca an tar ning hi Laica le Kawlca in pahnih in a si.
Pu Thla Hre nih, “lam hi min sak rih lomi 20 tluk kan ngeih rih caah tu i kan lam ah a min cuang lomi kan pa le cheukhat le min dang te te zong telh chih an si te ko lai. Cun lam ah an min a cuang mi hna an tuanbia tawi te te kha cauk ah chuah khawh kan i zuam lai. Cucu upa biachah cia mi zong a si” tiah a chim chap.
Lam ngan deuh min le Hakha khuachung min hngal deuh, zung ngan deuh tibantuk pawl hi Google map ah chiah ding in timhtuah nak an ngei i hmai lei deuh ah cun lamhmuhsaktu catlap (map) zong chuah ding in timhtuahnak an ngei tiah kan theih. Hi lam min kong ceihtu ahhin Hakha in, HCMP, Khuanu Khuapa, Mino phu, Biaknak le Media pawl an i tel ti kan theih.+++
About The Author
