Hakha Khuachung Lamtonnak Hmunkip Ah CCTV Le Thlalang An Bunh
Salai Elvis|2019 May 6| Motor le cycle hmangtu hna nih humhimnak kongah le ralrinnak lei ah a bawmtu a si lai ti saduhthahnak he Hakha khuachung lamtonnak hmun kip ah CCTV Camera le Thlalang an bunh hna tiah kan theih.
2019 May 4 ni ah CCTV cu Lamtonnak (suimilam tarnak zawn) le ramkulh cozah zung pawng lamtonnak hmun ah chiah a si cang.
Lam lei zulhphung kongkau Committee le No.16 phu motor PK hna hruainak in lam zulhphung zulh deuhnak, motor le cycle khaltu hna ralrinnak, mizapi caah humhimnak petu ding caah a tu bantuk in CCTV le Thlalang an bunh hi a si.
“Motor le cycle khaltu hna caah a bik in tuahmi le chiah a si, pakhat khat i khawndennak um sual seh law an zam zongah CCTV nih a tlaih dih cang hna lai. A tu tiangah cun khuachung lampi aa tonnak deuh hmun hnih ah CCTV bunh dih a si cang. A tang rih mi hmun dang zong kan bunh rih hna lai. Thlalang cu hmun thum ah kan bunh cang. Motor/cycle dir hlah! tinak zawn ah an dir sual a si ah le number aa benh lo sual ah cun motor, cycle le kethum ngei motor zong biatak tein dantat an si cang lai” tiah motor PK lutlai Ko Ko Maung nih a chim.
About The Author
